年纪勿小 慢比快好

文/钱红春

老早上班辰光从早忙到夜，屋里太太平平。退休了，日脚好过了，我同老伴反而经常斗起嘴来。为啥呢？主要是我嫌鄙伊做事体慢，伊怪我性子急。

就拿一道出门来讲，勿管远近，老伴每趟收拾停当，还要辣屋里来来回回看半天，检查煤气，检查电器，检查门窗，等伊觉着放心了才关门上锁。就算一道去附近小菜场买菜，出门辰光也要辣屋里向横看竖看。有几趟我实在熬勿牢，催伊“快点”，伊就朝我发火：“死老头子，又勿是去赶火车，急点啥啦？”后来我学乖了，出门勿再催，就自家立辣门口等，看伊磨到啥辰光。

搿招蛮灵光，伊看我辣门口勿耐烦个样子，好像也急了，匆匆忙忙看一遍就锁门。勿过搿能一来，伊有辰光会忘记点东西，又会怪我：“侪是侬呀！”“我又呒没催侬。”“侬搿副急吼吼个样子，比催还结棍。”呒没办法，还是我个错。

有一趟，单位要开退休人员座谈会，领导关照我做好发言准备。开会前一天夜里，老伴有点勿适意，一直到半夜里才困觉，我一早起来伊还辣打呼噜，我一家头轻手轻脚吃好早饭就出门了。

辣车站等车子个辰光，我想起出门前头呒没拿屋里检查一遍，搿个一向依赖老伴完成个“规定程序”被我疏忽了。趁车子还呒没来，我拿起床以后个动作侪“复盘”一遍。结果煤气是勿是关脱想勿起来了！我一下子紧张起来，煤气出事体性命交关，我越想越紧张，顾勿得车子进站，马上“向后转”。

奔回屋里一看，煤气果然呒没关脱。原来我吃好早饭，想帮老伴蒸两只馒头，出门呒没检查，煤气忘记关了。还算好，镬子里水还呒没烧干。搿辰光老伴醒了，问我：“辰光勿早，侬哪能还呒没走？”我装出啥事体也呒没发生过个样子讲：“就要走了，侬再困一歇。”

到仔单位，会议已经开始了。我刚刚坐好，主持人就要我发言。我打开背包寻发言稿，翻来翻去寻勿着。仔细一想，乃末尴尬，昨日写好个发言稿忘记带了。勿过，我还算活络，一本正经清清喉咙，拿早浪向发生个事体讲了一遍。我讲，老人反应慢，记性差，做事体千万勿好心急，急了难免会出事体，甚至出大事体。

发言结束，大家侪为我拍手。