儿时刻花乐无穷

文/袁念琪

刻花就是刻纸。伊勿是辣纸头浪刻朵花，而是刻人、动物、房子等各种花样。

我第一次学刻花是20世纪60年代后期、读小学三年级个辰光。埃歇辰光，阿拉搿点小朋友侪欢喜白相刻花。拿复好花样个纸头，下头垫好垫板；最好是铅皮垫板，因为塑料垫板浪会留下来刀个划痕。其实，最理想是辣玻璃板浪刻花，玻璃硬度高，一般勿会留刀痕。

粗看起来，用刻刀刻出来个刻花搭仔用剪刀剪出来个剪纸差勿多；其实刻花可以做得更加精细，而剪纸更适合制作对称花样。要想做出好个刻花，刀片邪气关键，刀片越锋利越好。记得我刚开始做刻花，用个是削铅笔个“铅笔刀”，由长约3厘米、宽约1.5厘米个薄铁片制作。后来用外公刮胡子个刀片，搿种刀片比铅笔刀更薄更锋利，可以刻出精细个花纹。搿两种刀片有个共同缺点，就是刀片小，捏起来勿方便。最好用个刀片是手术刀，同学“长脚”有亲眷辣医疗器械厂，能搞到报废个手术刀，刀柄拿起来手感好，刀片锋利，用伊刻花事半功倍。

刚开始练刻花，图案花样比较简单，线条较粗，勿易刻断。等到熟练了，图案越来越复杂，线条越来越精细。大家比啥人线条刻得细，越细越有本事。

有了刻刀，还要有纸头。纸头勿能太厚也勿能太软，否则刻起来邪气吃力。碰到自家欢喜个花样，可以到文具店买蜡光纸来刻。蜡光纸是一种单面彩色薄纸，有色彩一面光滑亮泽。

刀和纸有了，就要选花样了。花样从两个地方来，一是文具店买个剪纸，有同学买来，大家拷贝。另外也可以选连环画里个图画，主要是各种人物；选中以后用复写纸描图样。描个辰光还要添加连线，确保整个图样是连辣一道个。

一般自家欢喜个连环画是勿会借给别人描图样个，因为会留下明显个铅笔印子，而且必须用单面复写纸，假使碰着拆烂污个人用双面复写纸，那页连环画的背面就一塌糊涂了。因此，欢喜刻人物刻花个人往往会专门买一本有指定人物个连环画。我买过个最后一本连环画是《平原枪声》第一集《舌战红枪会》。

记得刻过电影连环画《地道战》里两张刻花。一是民兵队长高传宝，辣了窗口举枪瞄准，一枪打中了山田大队长个屁股。另外一张是伪军汤司令一手推帽檐一边喊：“给我放毒，灌水，把他们都闷死在里面。”这张刻花是从隔壁4号阿三头搿搭复制回来个，因为我个《地道战》里缺搿张图，勿晓得被啥人偷偷交撕走了。呒没当场发现，只好自家吃进了。

复制花样，最好用扁圆个木工铅笔；铅芯粗，画得清爽。先拿要复个花样放辣纸头下面，再拿铅笔“唰唰”涂满整张纸头，黑个线条要保留，白个要刻脱。

我拿自家做个刻花侪夹了一本书里。满意个，勿但蜡光纸刻花，还用白纸衬辣下头。可以讲，埃歇辰光呒没刻过花个小朋友是勿完整个，至少是少脱一份乐趣。

我出过一本书叫《上海姻缘》，封面搭仔插图才是上海市级非物质文化遗产“花样经剪纸”传承人郑树林个剪纸，伊用剪刀勿是刻刀。勿晓得伊小辰光白相过刻刀刻花口伐？