谢谢任溶溶先生

文/赵妃蓉

看到《没头脑和不高兴》个爸爸任溶溶过世个消息，心里邪气难过。伊是儿童文学大师，勿仅创作了交关多儿童文学作品，还翻译了交关外国儿童文学作品。

记得我小辰光，电台里经常播广播剧《没头脑和不高兴》，故事里“没头脑”和“不高兴”是两个孩子，一个做事总是丢三落四、忘东忘西，一个永远是让他往东偏往西，还总是把“不高兴”当口头禅。

“没头脑”长大后成了一个建筑设计师，设计了一幢300层个高楼，但是居然忘记设计电梯。大楼建成后，位于顶楼个剧场举行《武松打虎》个演出，小朋友们只好提前几天出门，背着铺盖和帐篷爬楼，一路爬一路抱怨，哪能还没到啊，但呒没人中途放弃，侪拼命往上爬，因为《武松打虎》个演出大家等了交关辰光了。经过几天跋涉，小朋友们终于来到剧场，演出也按时开幕。

“不高兴”长大后成了演员，在《武松打虎》中扮演老虎，大家侪等着看武松打死老虎，但是伊就是勿愿意被“打死”，一边喊着“不高兴”，一边上蹿下跳，武松怎么也“打不死”老虎，最后老虎还窜下舞台……就是迭样看上去夸张个情节，讲个其实是简单而深刻个道理。我就是从搿个作品里晓得了“认真”个重要性，否则侬周围个人侪要跟辣吃苦头，还懂得了凡事要开开心心去面对，动勿动就“不高兴”勿是一桩好事体。

后来《没头脑和不高兴》又有了动画片，但是辣我心里一直觉得广播剧更加有魅力，我也勿晓得为啥小辰光会勿厌其烦一遍遍听搿只故事，一边听还一边哈哈笑，现在想想也是蛮好白相个。

任溶溶翻译个交关外国童话也辣阿拉小辰光留下了深刻印象，每个小朋友看过《木偶奇遇记》侪勿敢再说谎，否则连困觉也会摸摸自家鼻头，生怕变长了；而看了《小飞侠彼得·潘》，大家侪会辣心底希望某一个夜晚，小飞侠也会飞到自家窗口，带自家去“梦幻岛”享受自由自在个生活；《夏洛的网》又让阿拉为小猪威尔伯和蜘蛛夏洛之间真挚个友谊眼泪水溚溚渧……迭样个阅读效果和任溶溶清晰流畅个文字是分勿开嗰。

从年龄浪向看，任溶溶老早就是爷爷辈个人物了，但是特别了勿起个是伊个文字一点呒没苍老个感觉，伊个心灵、文字一直保持着透明无邪个天真之气。近几年，伊还一直辣新民晚报“夜光杯”浪写文章，回忆伊小辰光，我看了还是会笑出声来，因为我也有过相同体会，被任溶溶写出来了。伊辣书里写过“人都是从小长大起来的，每一个人都有自己的小时候”。伊讲自己最欢喜看滑稽，“成为儿童文学作家后写东西就饶有风趣，尽量滑稽点。”所以每趟看完伊个文章，侪会觉得蛮噱嗰。

任溶溶曾经讲过伊个一生就是个童话，而阿拉小辰光能始终辣伊创造和翻译个童话陪伴下长大，再拿伊个作品和自家个小囡分享，阿拉是有多幸运啊，谢谢任溶溶先生！