大热天里讲扇子

文/周允中

“扇子扇子好风凉，整日整夜拿手浪。媳妇有点勿开心，我用扇子送风凉。朋友来了先倒茶，扇来凉风心情爽。”搿是我小辰光过暑假经常听到个一首童谣，反映了当时家家户户离勿开扇子个现实。

讲到扇子，小辰光到院子里乘风凉，一把扇子是人人必备之物，通常是蒲扇，又称芭蕉扇，既能扇风，又能驱赶蚊虫，轻轻一摇，凉风徐来，邪气爽快，堪称价廉物美个典范。

除脱蒲扇，还有折扇、团扇、羽毛扇，其中团扇个扇面通常为圆形，也有长圆、梅花、六角等形状，扇面用丝绸、绢帛等高档纺织品制作，点缀绣画，既轻巧又漂亮，就是价钿贵，一般属于工艺品，很少有人舍得辣乘风凉辰光拿出来用。

羽毛扇也是阿拉国家个一种传统用品，古代皇帝用雉羽制作长柄羽扇作为出行仪仗，三国诸葛亮手里个鹅毛扇更是家喻户晓。羽毛扇用个羽毛有野禽、家禽两种，野禽主要用雁、鹰、鹤、雕、鹭鸶、青鸡等个翅尾，家禽主要用白鹅、灰鹅个翎羽。《唐书》里对羽毛扇个记载是：其扇风缓而凉，病弱者用之，亦不伤风感冒，孕妇尤为适宜。因此，羽毛扇被誉为“纳凉妙品”。

至于折扇，里向花头劲也蛮透个，制作材料、制作方法多种多样，比如扇骨通常用竹木材料制作，但也有用象牙、玳瑁、金属制作个，扇面通常用纸制作，也有用木片、纺织品制作个，扇骨浪可以精雕细刻各种吉祥纹样，扇面浪可以涂抹香料，有些还请名家题字、绘画，格调邪气高雅。当然，平时乘风凉用个折扇一般就是竹扇骨、白纸面，价钿便宜。我印象比较深个是，当时去杭州旅行，看到一种檀香扇，凡是去旅游个人，基本浪侪会买一把珍藏留念。

勿仅中国有扇子，国外扇子也勿少，从交关西方油画里可以看到，勿少贵妇人手里会拿一柄扇子，显得风度高雅。1934年伦敦举行世界各国扇子展览会，英国皇后拿出十几把扇子参展，其中有一把是1789年英皇乔治三世个收藏。中国有一把折扇参加了迭次展览会，扇面浪是名家画个山水，扇骨用象牙制作，扇尾用珐琅质镶嵌金银细丝，精美绝伦，让观众惊叹。

到了上世纪80年代，各种电风扇进了千家万户。到了90年代，又普及了家用空调。然后，过热天就呒没啥人到户外乘风凉了，当年家家户户侪有个蒲扇只能辣各种怀旧展览浪看到了。