天热苦瓜“轧一脚”

文/邵天骏

苦瓜，听起来好像味道老苦，其实吃辣嘴巴里，只是稍微有点苦涩个感觉，还蛮爽口嗰。

伊个样子，两头尖尖，通体碧绿，表面有交关颗粒状果瘤。一般来讲，果瘤颗粒大而饱满，表示瓜肉比较厚；颗粒小，瓜肉相对薄一点，所以挑选个辰光要选果瘤大一点嗰。长椭圆形个苦瓜，又叫凉瓜，凉就成了热天吃苦瓜个一大理由，伊个功效交关多，按照中医个讲法，苦瓜气味苦、无毒、性寒，有清热祛暑、明目解毒、利尿凉血、解劳清心个功效，所以一到热天，苦瓜就成了大家青睐个家常菜。

阿拉屋里向，天热经常吃苦瓜。至于吃法，最便当就是凉拌。先拿苦瓜一剖两爿，去瓤洗净切片，放进沸水里向烫一烫，再放到凉开水里浸一浸，捞出来沥干。搿能一来，苦瓜个苦味道就可以去脱交关。再拌点香菜、芹菜、辣椒丝，放点酱油、豆瓣酱、蒜泥搭仔熟油拌匀就可以吃了。有辰光，苦味道也是一种特别个滋味。辣夏秋季节里品尝，反而感觉异常“可口”，是一道消夏、迎秋个特色菜。

除脱凉拌，清炒也是可以选用个做法之一。搿种做法，同样需要拿苦瓜去瓤洗净切片，切个辰光最好斜切，尽可能让果肉露出来，让调料个味道可以充分渗透进果肉。炒锅里稍微多放一点油，加一眼葱、姜，倒点醋，假使勿欢喜苦味道，还可以放点糖。搿能一来，炒出来个苦瓜勿苦、咸中带甜，味道特别好。然后就是快速翻炒，搿搭需要掌握好火候，一般翻炒到苦瓜七分熟，仍旧保持碧绿色就可以出锅了。

搿段辰光天天高温，苦瓜也成了阿拉屋里冰箱里个一道常备菜，天天来饭桌浪“轧一脚”。需要注意个是，苦瓜性凉，脾胃虚寒个人最好勿要吃，另外就是勿要一次吃太多。