酸酸甜甜黄皮果

文并图/沈一珠

陪姆妈到医院去拆线，顺便再配点药。搀牢伊走出医院门口个辰光，姆妈低仔头，轻轻交，又像自说自话：谢谢，我也有迭份福气。听到仔，呆一呆，呒没接口，再想想，还是呒没讲啥。姆妈平常一家头住，过日脚侪靠自家。

一个礼拜前头，姆妈勒屋里掼一跤，赶过去辰光，额骨头浪还勒出血。送到医院各种检查，还算好，也就缝了两针。所以，迭段辰光，姆妈就住勒阿拉屋里。

天热，麻烦个是一日三餐，一家门口味虽然差勿多，勿过，两代人个习惯还是有眼勿一样。比方讲，阿拉早浪贪便当，常常是面包、咖啡、水果混一混；姆妈欢喜清粥、乳腐，或者配一只小馒头；再比方，阿拉烧菜候分克数，一盆红烧肉，一人两三块，一顿吃光；姆妈欢喜烧一碗肉要吃几天，常常是一碗饭一块肉，再勿伸筷子了。总以为，迭个是老人家长期养成个做人家习惯。所以，干脆采取分食制，一人一盆，包干。结果，几天下来，姆妈讲，吃得太多，勿适意了。

想想蛮有意思，做人做事，常常是满腔热情对人家好，偏偏勿见得是人家想要个，所以，适可而止，无论吃个用个，弄清爽是侬自家要还是人家要，覅一门心思替别人做决定，蛮要紧。

天气热，消耗大，饮食也要补一补。因为热，太油腻个菜吃勿进，所以，推荐一样新鲜物事：黄皮，也叫黄皮果，产地辣南方，人称岭南佳果，是每年大热天里才有个一种水果。伊个名称搭仔果皮颜色有关：果皮起初深绿色，成熟以后变成黄颜色。黄皮果吃口酸酸甜甜，能帮助消化，南方民间有“饥食荔枝，饱食黄皮”个讲法。《本草纲目》里也有伊个条目，讲伊有“行气、消食、化痰”等作用。另外，伊还对保养心血管系统有帮助。勿过，脾胃虚寒搭仔高血糖个人勿适合吃。

黄皮蒸排骨，操作起来老便当：去核留果皮、果肉，切碎加糖做成黄皮酱，铺勒浆好个肋排浪，清蒸就好。或者，也可以烧一只黄皮清鸡汤：半只母鸡汏清爽，斩成块，摆进烧开个水里，加姜片若干，大火烧开转小火炖40分钟左右；加入去核去皮个黄皮果，小火炖两三分钟，加适量盐，若嫌酸，加点糖，就可以吃了。