书包里向装石板

文/钱红春

上世纪50年代初，我到了读小学个年纪，高高兴兴背起书包进了学堂。当时书包里只有两本书：算术、国语，按理讲书包勿会重，但当时造纸工业落后，纸张产量低，价钿又贵，为了节约草稿纸，平常上课就辣自家带个石板浪练字或者做算术题。葛牢每天出门去学堂，书包里除脱课本，还要带一块比课本重得多个石板。

搿块石板尺寸比课本稍微大一眼，是用天然黑色石片，两面磨平后做成，厚薄同窗玻璃差勿多。为了方便拿进拿出，同时防止石板边角刮破书包，石板用一圈宽木条包边。搿种石板是当时小学生最基本个学习用具，辣文具店或者校门口地摊浪侪能够买到。假使搿天有珠算课或者要写毛笔字，书包里除脱石板，还要带好算盘或者砚台，分量就更重了。

比较麻烦个是，搿块石板容易坏。特别是男同学，放学以后难免打打闹闹，书包勿当心碰着课桌椅，里向个石板就有可能破裂；也有到操场浪拿书包往两边地浪一放当球门踢皮球白相，一勿当心就会踩碎书包里个石板。葛牢刚刚开学辰光，大家个石板侪蛮好，等到学期结束，就变得五花八门。有个木框散了架；有个表面遍布裂缝；也有只剩一块稍微大点个碎片勉强对付。还好搿种石板勿贵，到新学期开学，大家个书包里又有一块新石板了。

辣石板浪写字用个是石笔。石笔个原料是滑石，切割成手指长，比筷子细点个石条。用石笔辣石板浪写字，勿但耐用，笔迹清晰，也勿会像粉笔一样产生粉尘。石笔个主要缺点是容易断，当然只要长短够捏辣手里，仍旧可以用来写字。

我刚刚读书个辰光，是从店里买来用细帆布做个新书包。假使单单放课本，搿种书包好用交关年数，可惜书包里天天要放一块石板，而且搿块石板比课本还重要，因为呒没带课本可以搭同桌合看，呒没石板就勿好做课堂练习了。小朋友欢喜白相，放学以后背仔书包蹦蹦跳跳，石板就辣书包里颠来颠去，辰光一长，书包底部就磨破脱了。当时大家侪勿富裕，爷娘舍勿得买新书包，只好补了又补。我当时个同学，尤其是男同学，书包底部大多侪有补丁。后来我爷娘勿晓得从啥地方弄来一块从帆布床浪拆下来个粗帆布，又厚又牢，请裁缝为我做仔一只双层底个书包。搿只书包我一直用到小学毕业，底部一直呒没破，当然书包分量也比较重。

后来造纸工业发展起来了，读书用个练习簿勿缺，石板也就慢慢交被淘汰了，但石板留拨我个印象却是邪气深刻。