老早仔个雁荡路

文/冯济民

雁荡路老早叫华龙路，是一条南北向个小马路，长二三百米。伊北接热闹个淮海中路，南连复兴公园。我从小住勒南昌路靠雁荡路口，对搿条路个印象特别深，交关事体侪记忆犹新。

雁荡路西面靠北一排生侪是永业大楼个底层。头浪是银行，过来一点起初是一家食品店，老板是广东人。记得小辰光姆妈经常带我去买饼干。蛮好个地方，后来有段辰光居然变成了废品回收站。再过去一点是西冷饮社，是吃咖啡个地方。后来变成味香斋面店，现在勒上海小有名气。勿过一碗辣酱面已经从1角5分涨到十几元了。面店隔壁一开始是三爿理发店，后来并起来叫中原理发厅，档次高了，价钿也贵了。再过去是永业大楼个辣末一个门口。搿搭老早一直有两只摊头。一只摊头浪有交关玻璃盒子，卖萝卜干、拷扁橄榄、盐金枣……老板有眼酒糟鼻，后来伊改行配钥匙。另外一只摊头卖芝麻香脆薄饼，当场做当场卖。

永业大楼朝南就是元昌里个房子了。有一爿炒货店搭一爿烟纸店。元昌里弄堂口有一只烫衣摊，夫妻俩合作经营，生意蛮好。当时我爸爸个衣裳侪勒搿搭烫个。弄堂口左面有一家山河文具店，卖文具搭仔玩具。记得有一趟我要姆妈帮我买一只小飞机，赖勒地浪勿肯走。再朝南就是华龙小学了，后来改叫雁荡路小学。校长叫潘岚音，是个新四军老战士。我姆妈也是小学老师，搭伊认得个。因为学堂小，呒没操扬，广播操是勒人行道浪做个。我弟弟小学就是勒迭搭读个。小学过去一眼有一只小弄堂，门口挂块牌子“雁荡路幼儿园”，我小辰光叫竞平托儿所。我勒搿搭学了两年，留下了好几张教室里吃饭、搭积木还有勒公园里活动个照片，侪是爸爸拍个。我从搿搭得到了人生第一张成绩报告单，当时只有3岁。托儿所再过去就是黄炎培办个中华职业教育社。迭搭有段辰光是建庆中学个校舍。再朝南过南昌路就是复兴公园了。

雁荡路东面头浪是培文公寓，底楼是妇女用品商店。过了兴安路是宝隆食品店，我小辰光一直拿糕点券到店里买小点心吃。朝南是一爿烟纸店，隔壁是老虎灶，一半地方烧水，一半地方吃茶，热天还拉起帘子拨人汏浴。老虎灶隔壁是顺泰理发店，迭是爿低档剃头店，我小辰光一直勒搿搭剃头。剃头店朝南是顾家弄幼儿园。隔壁就是顾家弄，可以直通重庆南路、太仓路。弄堂旁边有幢小洋房。再朝南侪是民居，一直到南昌路。

对短短个雁荡路老早仔个情况我太熟悉了。现在搿搭已经变成了步行街，也比老早洋派多了。东面前半段老房子侪拆脱造起了高楼。西面小学、幼儿园也侪呒没了，多了几爿洋气个小店搭仔高档钟表修理店。时代勒变化，雁荡路也已经今非昔比了。