想起益民厂个西瓜肉

微信扫码看视频 听钱程沪语朗读

◆ 金洪远

小辰光住勒虹口香烟桥路附近个弄堂里，离得勿远就是老底子个益民食品厂。当年对于住勒附近个人来讲，大热天防暑降温首先想到个是啥物事呢？老邻居侪会脱口而出：西瓜肉。也许有年轻读者会搞勿清爽，西瓜么西瓜了，哪能弄出来个“西瓜肉”啦。因为当时益民食品厂捺瓜皮做成西瓜酱，西瓜瓤就勒了门市部出售。因为买回来个西瓜呒没皮个，阿拉就叫伊西瓜肉。附近居民“近水楼台先得月”，五角洋钿好买回来一镬子，价钿是绝对亲民。

记得当年西瓜肉分为两种，红瓤个是“解放瓜”，黄瓤个是“平湖瓜”。每逢有西瓜肉出售，消息灵通人士一放出风声，阿拉弄堂里个小八腊子就为东家喊西家，一道捺仔镬子，沿牢沙泾港路赶到益民厂门市部排队。大热天，太阳捺地面晒得滚滚烫，呒没一歇歇功夫，阿拉搿点小八腊子就满头大汗了。不过，想到乘风凉辰光有西瓜肉吃，侬一调羹，我一调羹，唉呀想想也甜味味嗰。

买回来个西瓜肉最好冰一冰，冰好个西瓜肉阴笃笃甜津津，吃一口消暑降温。可惜当年呒没家用冰箱，平常能够看到个冷冻设备，就是食品商店里卖冷饮个冰柜。但是搿种冰柜侪是0摄氏度以下个温度，相当于家用冰箱个冷冻室，勿适合冰西瓜肉。

幸好当年阿拉弄堂里有一口井，用过井水个人侪晓得，井水个温度一般勒了10度左右，勒了辣豁豁个大热天里，搿口井也就成了左邻右舍共用个“土冰箱”。大家轮流捺需要冷藏个物事摆勒了水桶里，放到井里，让井水没过水桶。也有人等勿急，索性吊几桶井水上来，勒了自家屋里降温。

到了夜里向，前楼个爷叔搭仔亭子间个阿姨侪来晒台浪乘风凉，竹躺椅、小台子、茶壶、茶杯，用井水降过温个西瓜肉隆重登场，大家一道分享，茄茄山河，其乐融融。

记得当年爷叔一边摇蒲扇一边讲，益民食品厂捺西瓜肉挖出来卖拨阿拉，主要是捺西瓜皮做成勿同风味个西瓜酱，厚一点个瓜皮还可以做成西瓜条，侪是出口商品噢。特别是加了桂花、玫瑰等香料个西瓜酱，勒了国外是斜气受欢迎。当时阿拉搿点小朋友听辣海，心里向偷偷勒了笑：老外拎勿清，西瓜肉勿吃，吃西瓜皮，戆大！