关于养生个事体

◆ 赵妃蓉

关于养生个话题是现在所有年龄段个人侪关心个事体。前一段辰光，年轻人自家到药房配酸梅汤，搿种事体也可以冲上热搜，现在天冷了，各种中药配方个茶饮也供不应求了。实际浪向，养生迭桩事体老底子大家也是关心嗰。比如我小辰光呒没电饭煲，外婆烧饭个辰光总归会守辣煤气灶旁边，米汤烧开就拿起锅盖，辣锅盖搭仔锅子当中放一根筷子，防止米汤潽出来，水头收了一点以后，外婆就会用汤勺拿最上头个一层米油畀我吃。长大了才晓得，米油里有交关大米个营养，外婆是用最朴素个方式捺最有营养个物事畀我吃了，但是小辰光只晓得米油清香醇厚，每趟从外婆手里接过碗，凉一凉，我就迫不及待吃光了，从来呒没问过外婆要勿要也吃一口？

老底子当冬天来了以后，只要阳光普照，外婆就一定会搬一只小矮凳到弄堂口晒太阳，顺便再晒晒被头，外婆讲晒得暖烘烘就勿会怕冷，勿怕冷么身体抵抗力就增加了呀。长大了才晓得晒太阳可以补钙。小辰光经常看到隔壁邻居个女儿帮伊姆妈敲背，我觉得好白相，也会上去攥紧小拳头敲一敲，后来才晓得敲背个作用就和现在流行个捏脊老像嗰，多敲敲背可以让背部肌肉松解，让背后个血脉保持畅通，对身体有好处。

小辰光大人做个交关事体实际浪向侪和养生搭界，比如端午节快来个辰光，到中药房买点藿香、菖蒲、艾叶、薄荷，用棉布包成小粽子个样子，又应景又有驱蚊避虫个作用；到了夏天姆妈总归会辣下班个辰光带一瓶绿豆薏仁汤回来，又好吃又可以祛除暑热……

对于养生迭桩事体，从古到今侪讲求身心同调，我觉得小辰光辣精神层面最好个养生就是邻里之间生活浪向互相照顾，从帮邻居收衣裳到借煤炉个炉火热饭，再到双职工个子女放学以后先到邻居屋里做功课……迭些虽然看上去侪是生活个细枝末节，但是辣呒没手机个年代，搿个就是连接人与人之间关系个情感纽带，是让人现在回想起来依然怀念个温情岁月。