“秋冻”也要有讲究

◆ 顾家德

俗话讲：“春捂秋冻。”勿少人以为秋天冻冻更健康，其实“秋冻”是有讲究嗰。我是一个八旬老人，对“秋冻”总结出一些做法。

第一，勿是所有人侪适合“秋冻”。身强力壮个人可以适当“秋冻”，但体弱个人搭仔老年人就需要阶梯式添衣保暖，营造舒适“小气候”。事实浪，秋风吹，天转寒，血管会收缩，有医院统计，每年秋凉，心脑血管毛病会增加三成。

第二，有基础病个老年人特别需要注意保暖，贸然“秋冻”会加重病情。户外活动也要尽量避免勒早夜低温个辰光进行。

第三，老年人头颈部受冷会影响脑部供血，因此一入秋我就戴好帽子，随气温下降，从单帽换成棉帽，再用高领衣裳、围巾保护颈部。另外，肩关节、膝关节、脚部受冻可能会引起关节炎，所以有“白露身勿露，寒露脚勿露”个古训。