呱呱叫个“农家乐”

◆ 钱红春

“五一黄金周”刚过了，有退休老同事邀请我搭老伴一道去苏州西山“农家乐”白相。

西山离苏州有四十几公里，面积大约82平方公里，是太湖当中顶大个岛屿。

搿天一早，阿拉十几个人分乘三部轿车，一个多钟头就到连接西山个太湖大桥。桥两边个湖面波光粼粼，湖光山色就像一幅多彩个油画，斜气好看。

“农家乐”个老板娘姓蔡，四十几岁，能说会道，腰浪围一块深色饭单，熟悉伊个老同事侪喊伊“阿庆嫂”。阿拉一上岛，老板娘就勿停打手机，问阿拉到啥地方了，怕中饭烧早了会冷脱。

“阿庆嫂”经营“农家乐”十多年了，自家有一幢四层楼房，底层是餐厅搭厨房，楼浪侪是客房。客房配置搭宾馆差勿多，比较宽敞。大家一到，老板娘就拿钥匙插辣门锁浪，用勿着安排就各自进房间。中饭交关丰盛，冷盆热炒总共有十六只菜。

吃好中饭休息一歇，大家就到附近一个叫“明月湾”个公园白相。老张拿出四轴无人机，准备寻一块空地放飞。搿是伊三年前花好几千块买嗰，现在出门旅游，伊侪要航拍，制作成影片，放到屋里个电视机浪笃笃定定看。搿天伊头颈浪挂好遥控器操作无人机，一歇悬停，一歇升空，一歇俯冲，一歇盘旋，吸引交关游客过来看闹猛。

正当伊得意个辰光，无人机突然失控落下来了。伊一呆，两只手辣遥控器浪横揿竖揿，就是勿见无人机飞起来。大家一道帮忙寻，一直到天暗下来也呒没寻着。回到“农家乐”，老板娘听阿拉讲起搿桩事体，问清爽无人机消失个方位就急匆匆出门了。过了一个多钟头，老板娘手捧无人机回来了。原来，老板娘辣“明月湾”外头个居民区寻仔好几遍，结果辣一间平房外头个柴堆浪寻到了。

搿天夜饭，大家向老板娘敬酒表示感谢。老板娘讲，出门就要开开心心，假使寻勿着，我也难过嗰。

接下来，大家先到太湖边个渔船码头白相，到湖边拍照，又到镇浪兜兜逛逛，去农贸市场采购，三天两夜一晃就过去了。

我搭老伴已经记勿清去过几趟苏州西山了，但搿趟是顶开心嗰。呒没人催促赶景点，也用勿着担心跟勿上旅伴，自由自在就好。难怪老伴勿搭我商量，就对组织搿趟活动个老陆讲：“下趟‘农家乐’一定要叫阿拉。”真是呱呱叫个“农家乐”。