做一碗桂花糖芋艿

◆ 沈一珠

今朝秋分。秋分是廿四节气里第十六个节气，也是秋季第四个节气。

董仲舒《春秋繁露》里讲，“秋分者，阴阳相半也。故昼夜均而寒暑平。”意思是其一，秋分搿天，日夜各半，平分；其二，从立秋到霜降，整个秋日90天，又以搿天为界，前一半结束，后一半开始。

从前还乱写过一段文字：有意思个是，总归有一半人勿欢喜秋天，因为秋天落叶纷纷，冷雨沥沥，还有寒蝉凄切；所以就有了柳永，有了“多情伤离别，更那堪，冷落清秋节”。当然，也总归有一半人欢喜秋天，秋天有红叶、有飞花，更何况还有一树一树嗰勿冷勿肯香个桂花，于是还有了桂花酒、桂花糕、桂花糖藕……惹得人，就想孵勒有桂花味道个秋天里，勿离勿弃。

所以，就有人生出秋分个哲学概念，一半一半个思想方式。其实迭个思想古以有之：杭州灵隐寺里就有迭能一副对联：人生哪能多如意，万事只求半称心。

迭能多想想，过日脚也就心平气和。

好味知时节，搿就勿好辜负应时而来个桂花了，而且秋分之前，受暑热余气影响，一般感觉温燥；秋分以后，气温下降，寒凉气息加重，凉燥增多，葛末做一份润口润心个桂花糖芋艿。

材料：红梗小芋艿半斤左右，红糖、干桂花各少许。

做法：先拿芋艿汏清爽，蒸熟，去皮；再拿芋艿加入冷水适量，大火烧开，加红糖小火焐软烂；最后盛出来，撒点桂花就好吃了。光洁个小芋艿口感润滑爽口、香甜酥软，汤汁清亮，散发浓郁个桂花香，吃一口，唇齿留香。