直播带货与“马路戏”

◆ 侯宝良

讲起直播带货搿种王婆卖瓜式个场景，相信交关老上海侪会想起当年个“马路戏”。虽说“马路戏”里有勿少地方戏曲个表演，但也有“卖拳头”“变戏法”“猢狲出把戏”之类杂七杂八个表演。山东人表演武术个比较多，俗称“山东人卖拳头”；“猢狲出把戏”，河南人、河北人比较多；“变戏法”搭子“说唱”个大多数是苏浙一带来个。“马路戏”开场，先要卖力演一段，或者敲一段锣鼓，迭个就叫“暖场子”，等到有了一眼人气了，表演个人就要停下来了，就像说书人个“且听下回分解”。懂经个观众就晓得伊要“卖关子”了，目的不是卖货，就是讨钞票。

“马路戏”一般选勒了下半天开演，可以一直演到吃夜饭，表演个场地一般选勒了人比较多个小马路，用石灰粉勒了地浪向画一圈，迭个就是表演个舞台。前排观众一般侪是住勒了附近个小朋友，我就曾经去轧过闹猛，近距离看过“手掌劈砖”，也看过“口吞宝剑”。至于“猢狲出把戏”就更加有趣了，表演个节目比正规马戏团简单，只是翻跟斗、滚铁圈之类，但是驯猴子个人拿功夫侪放勒了教猴子讨钞票浪向，只要伊吆喝两声，猴子就会直立行走，拿只帽子或者饭碗，绕过前排个小朋友，向立勒了后面个大人讨钞票。有辰光还会得翻人家个袋袋，人家也勿好意思跟猴子一般见识。

表演“卖拳头”个一般会卖“祖传伤药”。“唱小曲”个大多数是带货个，譬方讲卖批发来个梨膏糖、卖自家做个小工具、卖外地个土特产咾啥。当时阿里邻居里向有一个从苏州来个女房客，会唱几句评弹，伊个爷娘勒了屋里向做粽子糖，她就出去说书、唱开篇，然后卖粽子糖，口称“苏州采芝斋”。还有卖魔术小教程，或者印有某些生活小窍门个小册子个。其实搿眼小知识啊，侪是从图书馆里摘抄下来个。吃开口饭个人就要动脑筋，寻来各种各样小资料，自家刻蜡纸、油印、装订起来，再凭伊个三寸不烂之舌推销出去，混点钞票养家糊口。

“马路戏”曾经是旧社会一部分穷苦老百姓谋生个手段，其中难免有人坑蒙拐骗，搭现在持证上岗个街头艺人是完全勿一样个。上个世纪50年代后期，国家有关政策落实，一部分的确有表演才能个“马路戏”演员陆陆续续拨各级文艺单位招收，其余个闲散人员就规劝伊拉回老家。上海街头个“马路戏”就此消声匿迹。