记忆里个中央商场

◆ 钱红春

现在有点年纪个老上海人，中央商场就算呒没去过，也一定听说过。

中央商场勒四川中路、江西中路、南京东路和九江路之间搿块地方，是由一幢大楼底层搭几条小马路两边个棚屋摊位组成。里向卖个商品既勿是用过个旧货，也勿是出厂个新品，而是稍微有点瑕疵，勿影响使用个残次品，或者是库存积压个商品，以及同居民生活相关个常用器具搭零配件。因为价钿便宜，商场里从早到夜侪是人。

讲到中央商场最大个特色，应该是里向有交关修配柜台，是当时全上海修配服务最齐全个地方。勒了“新三年、旧三年、缝缝补补又三年”个日脚里，里向个修理师傅能够让交关其他地方呒没办法修个物事变废为宝起死回生。可以讲，中央商场同当年上海人个生活息息相关。

上个世纪六十年代，我离开部队，回到上海，被分配到一家工厂工作，因为上班路远，就买了一部旧脚踏车。呒没想到，用了勿长辰光，搿部脚踏车就成了“除脱铃勿响，其他侪响”个“药罐头”，三日两头要修，厂里每个月两块洋钿车贴全部拿来修车子也勿够。为了节省修车子个钞票，我只好自家动手。挡泥板、飞轮、链条、车胎……可以讲，除脱车架，其他零件侪陆陆续续换过一遍，侪是从中央商场买来个。后来因为工作需要，单位每个月为我买公交月票，从此告别脚踏车。

我勒中央商场买得最多个是各种工具，有木锯、钢锯、刨刀、手摇钻、小台钳、旋凿、活络扳手等。我用搿点工具，用当时要凭户口簿才能买到个零星木料，每天下班就勒屋里个晒台浪锯锯刨刨，敲敲打打。我做过放碗筷个碗橱；做过大大小小个吊橱；也做过沙发、电视柜。虽然手艺勿算好，倒也结实耐用。至于从中央商场买过啥电器，印象比较深个是一只台式收音机，收音清晰，声音宏亮，因为外壳有点开裂，价钿只有正品个一半。

后来屋里搬场，离中央商场远了。加上改革开放后收入提高，过日脚用勿着为了省钞票横算竖算。特别是市场竞争越来越结棍，残次品搭库存积压商品也越来越少，我也慢慢交告别了中央商场。

我退休后呒没去过中央商场，但关于伊个新闻报道，我侪会关注。因为伊拨我留下来太多个回忆，有因为缺货而白跑一趟个失望；有到处买勿着，勒此地齐巧碰着个惊喜；也有货比三家，发现买贵了个懊恼。伊见证了一个时代上海人从物资稀缺到生活富足个变迁。