两角洋钿一担水

◆小 申

前几天，看朋友勒视频号浪讲老早老虎灶泡开水，一热水瓶一分两分、一担热水要一角两分；我记忆当中小辰光去广元路老虎灶叫开水，送一担热水要收两角洋钿。

当时阿拉屋里住辣新式里弄房子个三楼，搿种房子当时号称“落地钢窗、打蜡地板、抽水马桶、阳台晒台”，还有最吃价个“大小卫生”。啥意思呢？“小卫生”指抽水马桶，“大卫生”指浴缸。可惜虽然安装了浴缸，但是只有冷水，冬天想要辣近两米长个铸铁搪瓷浴缸里汏浴，三四只热水瓶里个热水浇下去一歇歇就冷脱了，所以想辣浴缸里汏浴，先要叫老虎灶送一担水过来。老虎灶备有专用个木桶，木桶浪有盖头，挑个辰光水勿会溅出来，也便于路浪保温。

勿过要拿一担水挑上三楼是真勿容易！每层楼梯侪有十几级台阶，一担水前高后低挑勒肩胛浪，腰背腿臂侪要用力。扁担两头两只木桶，右手提、左手拎，当中勿能停，要一鼓作气上楼。楼梯浪转弯也勿轻松，最怕迎面碰着人，万一热水溅出来烫伤人就闯祸了，所以挑水师傅一边走一边喊：“开水来啦！当心烫痛！”终于上到三楼，热水桶放到地浪，师傅才能松口气。两桶滚滚烫个热水倒进浴缸，满房间雾气氤氲，再冷个天也勿觉着冷了。侬讲讲看：迭个两角洋钿值得口伐？