做一碗油豆腐冻

◆ 沈一珠

今朝早饭蛮简单，小碗里麦片一大调羹、黄金亚麻籽粉一小调羹，开水冲一冲；两只鸡蛋，加一点点玫瑰盐、白胡椒粉一道打匀，横竖两刀，白面包片一切为四，鸡蛋液里浸一浸，平底锅里淋一点点油，七八成热，面包片轻轻交摆下去，两面煎到鸡蛋液结起来就好，金黄颜色，好看又好吃。

有辰光想想，交关好吃物事，侪是简简单单个。

前两天到绍兴去白相，本来讲好一顿中饭是到亲眷屋里烧烧吃吃，结果亲眷看到人多，还是定了“绍兴老味道”。饭店就勒河浜旁边，绍兴水多，倒也勿稀奇，稀奇个是饭店老板个师父是绍兴菜非遗传承人，伊自家也拿绍兴味道传承仔32年了。搿天老板就立勒饭店门口，笑嘻嘻看人点菜、拍照，笑嘻嘻讲一句，帮阿拉多宣传。抬头看看二楼过道通风处挂了一排酱好个鸡鸭鱼肉，不少地方个人侪欢喜吃迭些物事，不过，饭店自酱自销，勿大看见了。值得一提个是一道冷菜，叫“油豆腐冻”。讲老实闲话，辣末生头看伊端上桌，还真有点呆牢了——迭个原本应该是家常菜里勿上台面个碗脚脚，偏偏又是交关人欢喜个，一碗红烧肉或者红烧鱼，吃剩半碗，摆到明朝，大冷天里半碗剩菜就可以冻成一坨，掘一块放进嘴巴，滑嫩鲜香。就算呒没其他小菜，也能有滋有味吃一碗白饭。

眼门前迭碟“剩菜”，切成手指头长短个长方条，油豆腐与冻互相联结又彼此独立，看起来应该是家常剩菜个升级版。搿天，饭台浪向齐巧有一个长得雪白粉嫩个四五岁小弟弟，只看见伊娘娘（祖母）端仔一小碗白饭，一口油豆腐冻一口饭，一歇歇工夫，一碗白饭吃得清清爽爽。

勿晓得绍兴菜烹饪技艺列入非遗个依据是啥？不过，看见迭个糯米团子一样个小朋友就晓得，对家常味道个欢喜，就是迭能一代一代传承下来个。

油豆腐烧肉：五花肉1斤左右，汏清爽切成长方块，油镬里葱姜煸香，五花肉摆下去翻炒到肉表面变白，加适量盐、酱油、料酒大火烧开，中火焖到七八分熟，加油豆腐适量，欢喜多吃点冻个，加点水，欢喜甜个，加点冰糖，小火焖烧到肉酥，盛出来就好。只要肉是新鲜个，尽量少摆茴香八角，香料多了，会伤到肉个自然香气。

侬可以盛一碗趁热吃，再盛一碗摆到明朝吃油豆腐冻。侬会发觉，各有各个味道。