石库门里泡饭香

微信扫码看视频听钱程沪语朗读

◆卢忠雁

讲起泡饭，总让老上海人想起熟悉个味道。搿碗隔夜饭加开水烧出来个吃食里，有上海人最朴素个生活哲学——既要精打细算，又要拿寻常日脚过出诗意。

早上天还呒没亮，石库门里个灶披间就闹猛起来了。钢精锅放辣煤炉浪，锅子里开水“咕嘟”响，姆妈拿隔夜饭倒进锅子，雪白个米粒辣开水里一点点变得莹润，就像融进了夜里个月光。老辈人讲：“新饭养人，泡饭养心”，搿碗用剩饭制作个吃食里承载着勤俭持家个老传统。

讲究人家用炖煮整夜个高汤做底，鸡骨火腿香渗进米粒，汤汁浓得像琥珀；寻常百姓偏爱清水泡饭，米粒吸饱水，软糯带筋骨，满是谷物本真个清甜。隔壁周阿婆总讲：“泡饭要清汤寡水才见真章，做人素净些才长远。”

搭配泡饭个小菜最见巧思。装辣玻璃瓶里个乳黄瓜、宝塔菜，香脆爽口，咬下去“咯吱”响；红心咸鸭蛋用筷子戳开，蛋白滑嫩不咸涩，蛋黄油润咸香浓。紫菜泡到开水里，舒展成深紫色个云朵，撒一勺虾皮，像碎金落入玉盘，让素淡泡饭有了海鲜味道。

清晨个阳光里，大口吞咽泡饭个“呼噜”声搭仔吴侬软语融合成一首弄堂晨曲。爷叔手捧搪瓷碗，蹲了墙根吃泡饭看报纸；张师母端仔菜碗串门，拿新腌个酱菜分拨邻居；小囡坐辣饭桌边，阿婆端碗耐心喂，米粒沾在笑脸上。

夏日里，泡饭最是消暑。井水冰镇像冷饮，薄荷煮汤更清凉，搭配腐乳嫩姜丝，吃一口暑气全消。弄堂口个老茶客，咬一口脆酱瓜，啜一口冷泡饭，摇着蒲扇茄山河，自得其乐乘风凉。

对离乡个游子来讲，泡饭是味蕾上个乡愁。纽约唐人街个菜馆里，有人面对泡饭红了眼眶；东京个写字楼中，加班白领拿保温杯泡冷饭，搭配便利店买个酱菜，就像回到了石库门。搿碗吃食里有姆妈个温度，有阿婆个关爱，有邻里个温情。

石库门被高楼取代，泡饭也与时俱进。大饭店有龙虾泡饭配松露，年轻人用三文鱼过泡饭。但老食客最欢喜个，还是清水泡白饭配酱菜，里向有岁月个味道。

上海人讲“做人家”，泡饭是最好个注脚。从一碗隔夜饭到一锅特色美味，搿碗吃食让阿拉晓得：生活个真谛勿是奢华，而是用心。就像王家阿伯讲个：“泡饭要慢品，日脚要细过。”

搿碗飘香个泡饭承载着几代人个记忆，见证了上海个变迁，温暖了普通人个寻常日脚。伊是时光里个味觉密码，是搿座城市最动人个烟火诗篇。