热天里向吃海鲜

◆ 沈一珠

伏天里向侪是顶顶热个日脚；就当是消暑，也定定神清清心，就又开始画画，临一幅灰调子个向日葵，颜色文文雅雅个，背景里个亮部是米灰夹一点点红——迭个红还真正就是一点点，多了就火气大了，像大热天里辣豁豁个大太阳一样，行勿消；而暗部则是米灰里夹一点点紫——迭个紫又一点点多勿得，稍许过头一眼眼就闷脱了，就像迭两日明明是伏天，偏偏又夹几日闷热潮湿个黄梅天气，阴沉沉让人郁闷个。常常会迭能想，画图，吃物事，甚至于过日脚，难得是样样侪正正好，过头了，就勿像腔了。

画面个主体是小花瓶里插仔几枝向日葵，不过，花瓶虚化了，突出个是花，就像编故事写剧本要突出主要矛盾，画画也一样；画面斜气清凉，有点辣树荫头里乘风凉个感觉；叶子虽然是绿个，但因为有前后、正反面，所以颜色就万般变化，有暗紫个，有灰绿个，也有深绿个，看上去杂七杂八个，但总离勿了绿；向日葵画得老概括，亮黄颜色是花瓣，深紫色是花盘，里向是不是已结成香瓜子？勿管伊了，迭个勿是画画要解决个问题。

每到礼拜四下半天，雷打不动个，去海燕个画室，是奔着研习画画去个；不过，夜里凑一道吃饭，像煞更让人睏梦头里也想；迭个礼拜四，吃个是海燕上半日刚刚从象山带回来个海鲜——满地爬个青蟹，黄澄澄、亮晶晶个梅童，还有一条离水辰光不长个翘嘴鱼，也叫蘸翘鱼。

各有各个烧法，先讲翘嘴鱼，潮汕有道菜叫冻鱼饭，用个就是迭种鱼。就像老婆饼里呒没老婆，冻鱼饭里也呒没饭；据说是因为老早辰光大米比较金贵，渔民出海就以鱼当饭了。新鲜鱼汏清爽，用盐里里外外擦一遍，再摆辣葱姜水里浸脱半个钟头，拿出来，葱姜塞到鱼肚皮里，去腥，鱼身上盖一片黄芽菜叶子以防止鱼蒸破相，隔水蒸一刻钟，摆冰箱冻3个钟头以上，拿出切块上桌，蘸当地普宁豆酱是绝配。搿天阿拉是现蒸现吃个，隔水蒸12分钟，鱼肉厚实鲜香，Q弹，一块落肚，蛮撑，确实可以当饭。

青蟹活杀，葱姜水倒辣蒸锅里，大火烧开，再拿青蟹摆上蒸格，蒸15分钟就好，清清爽爽个蟹肉鲜味，带一点点回甘；而梅童通常也是清蒸个，搿天海燕即兴改了吃法，先拿鱼圆鱼肚跟小芹菜一道烧只底汤，再拿汏清爽个梅童轻轻交摆进去，大火烧一滚就端上桌，夹一条入口，轻轻抿一抿，鱼肉软嫩像豆腐，入口即化。

海燕讲，搿歇辰光，吃点海鲜补个。其实，补着个岂止是海鲜。