香莴笋拌海蜇丝

◆ 沈一珠

搿几天虽然高温，但至少有微风徐徐。画室里，有人画了一幅图——旧金山渔人码头，抬头看看蓝天白云，天高云轻；低头看看人影绰绰，远远交太阳光下头立了一排人，人跟影子纠结辣一道，又安静又闹猛，交关惬意。虽然勿算顶欢喜渔人码头迭个地方，不过，眼门前迭幅即将完成个小画让人想起2026年初，一家三口分别从上海、纽约飞到旧金山，辣渔人码头无所事事荡荡吃吃，搿一段辰光是让人欢喜至极个。

前两日，也是高温天气，跟朋友约辣徐家汇天钥桥路煤科大厦三楼个一家饭店吃饭，看错辰光，早到了一个钟头，想想，老里八早坐辣饭店等吃饭难为情个，就到对面汇联商厦兜兜。一向欢喜迭家店，其实，也就欢喜迭家店局部地区扑扑满个鲜香味道，总让人胃口大开：咸草鸡、盐水鹅咾啥刚刚斩好端出来，咸鲜味道丝丝缕缕尽撩人；带鱼炸到外酥里嫩，又用糟卤浸透，有点甜咪咪有点辣蓬蓬，鱼骨头嘬嘬也醉人；背靠马路个柜台勿大勿小一如既往，曲奇饼干、花生排、杏仁酥……奶香奶香，从小吃到大，像煞从来呒没厌脱过，还有奶油桃板、苏式话梅、现磨芝麻粉、山楂糖葫芦、苔条梗、蜜三刀……

提前有了迭能一段闻之开胃、生津、提神、消暑个百味杂陈交响乐，接下去个饭局相当愉快，该冷冷该热热，每一碟侪好吃，不过，顶顶欢喜个却是一味清清爽爽个香莴笋拌海蜇丝，香莴笋丝绵绵柔柔中带点爽口，海蜇皮薄料料嚼上去却刮辣松脆，清爽相得来，让人回转去还牵记。顶要紧，几乎人人侪够得着吃得起个材料，操作起来还简单。

香莴笋拌海蜇丝做法：

一根香莴笋，5元洋钿左右，刨成丝，用盐腌10分钟，汏清爽，捏干备用；一袋原味海蜇丝500克，10元左右，可分两次用，迭碟菜里，海蜇丝是配角；清水里冲泡两三次，挤干水分备用；蘸料各人各欢喜，不过，为尽可能保持香莴笋个鲜洁搭仔海蛰丝个海味，建议简单点为好，盐、糖各适量，熬点香葱热油淋上去，可以让香莴笋更加软熟点，最后淋少许麻油、香醋拌匀，提香解腻就好。

就算是顶顶简单个开心味道，也要觉得着才好。