忆当年看立体电影

文/冯济民

辣交关人个印象里，3D电影院遍地开花是进入21世纪之后个事体。其实，现在大家常常讲个3D电影，阿拉当年叫伊立体电影。看立体电影已经是上世纪60年代个事体了。

20世纪60年代初，勒上海东湖路有座东湖电影院，迭是中国首座专门放映立体电影个电影院。记得当时放映两部影片。一部是风光片，好像叫《漓江游记》。一部是喜剧片，名字叫《魔术师的奇遇》。

当时我读初中，看立体电影成了阿拉个一大享受。看立体电影搭看一般电影勿同个是，看个辰光要戴一副特制眼镜。戴上这种眼镜看电影，影片中个一切邪气逼真。汽车、火车会朝侬身浪开过来。魔术师个水枪一开，水柱就朝观众面孔喷过来，观众会勿由自主个避让，然后发现虚惊一场，交关有趣。

有趣个是，搿部《魔术师的奇遇》勿到50分钟，电影放到一半还有“中场休息”。据说是因为看立体电影，眼睛比较吃力，中场休息能保护视力。当然，还有一个说法是，普通电影由两台放映机交替放映，一盘拷贝放完了，另一台接上，而立体电影采用两台放映机同时放，模拟左右眼个视野，放映员要在中场休息时换拷贝。

东湖电影院有一个相当漂亮个小花园，中场休息个辰光，观众可以到小花园里透透气。

时过境迁。当年东湖电影院所在个东湖路9号，现在造起了高高个东湖大厦。也勿晓得电影院是啥辰光拆脱个。当年迭搭曾连续放映了4年《魔术师的奇遇》，成为名噪一时个上海文化打卡地，一票难求。

主演影片的陈强、韩非、程之、孙景璐等著名电影演员侪已作古。当时个一切只是留勒阿拉搿代人脑海中个记忆了。现在个年轻人对此已少有人知。

讲起立体电影，我搭伊还有一段缘分。近二十年前，我曾参与筹建中国航海博物馆。因馆内设有4D立体影院，我于2008年随团去美国、加拿大考察当地航海博物馆个辰光，曾专门考察了美国搭仔加拿大个著名4D电影公司，现场察看并商谈引进放映设备事宜。

搭3D电影相比，4D电影除了有立体个视觉画面，放映现场还能模拟闪电、烟雾、雪花、气味等环境变化，观众个座椅还能执行下坠、震动、吹风、喷水等动作。迭眼现场效果搭仔立体画面个剧情紧密结合，勿仅通过视觉，还能通过触觉、嗅觉等体验电影效果，拨观众带来更加身临其境个娱乐效果。

现在，勒临港地区滴水湖边浪有一家中国航海博物馆，里向有一爿可以让观众观看最新4D电影个影院。据介绍，搿家影院是目前上海最先进个4D影院，有勿少来博物馆参观个人会抽出辰光，一睹为快。