烤只金黄大闸蟹

文并图/沈一珠

阴阳相半，寒暑平分；美食无限，秋意缤纷。

秋分已过，秋天个感觉越来越明显。记得有个叫董仲舒个，写过一本《春秋繁露》，里向写道：“秋分者，阴阳相半也，故昼夜均而寒暑平。”听得出来，伊是讲秋分前后，勿冷勿热，是一年当中顶顶惬意个日脚。

勿过么，世事难料，2023年一大半辰光侪是雨水连绵，体感闷热，黏滋疙瘩。真心希望今年剩下来个日脚里，除脱沥沥淅淅，侪是清朗搭仔舒爽。

还好，秋天里个色彩斑斓还看得见吃得着。譬方讲，昨日吃到一泡生普，名字老文艺：黑森林猫耳朵。看外形，条索紧实干脆，浓夏里个苍绿里，夹点仲秋前后个草木黄，开水滚滚冲下去，香得来，沁心沁肺。再比方讲，一篮头蔬果里，是香气袭人个南瓜黄、柿子红、葡萄紫。晓得“苏州红”是啥口伐？是苏州“水八仙”之一个水红菱，甜甜脆脆可以生吃个。粉嘟嘟糯叽叽个“白富美”，是时鲜个鸡头米咯，搭碧绿个小豌豆清炒，看起来山青水绿。

多“食”之秋里顶好个一样物事，应该是迭段辰光新鲜上市个大闸蟹了。至于哪能烧法?除脱传统个清蒸酱烧，也可以试试新吃法，譬如，花雕烤大闸蟹，金黄金黄个，是秋天里个高光。

具体做法：大闸蟹两三只，配葱、姜搭仔花雕酒2两左右。蟹汏清爽，沥干，放点姜片、花雕酒，盖紧，腌廿分钟，拎出来，用锡纸包好；烤箱200摄氏度预热，大闸蟹摆烤箱中层，上下火，烘烤20分钟左右关火，再利用余温焖两三分钟，拿出来，调一份糖醋葱姜料，就可以吃了。

大闸蟹膏美黄肥，就是有点寒气，花雕酒温热，正好调匀一下，好吃勿伤身。