自家做盆“肉皮冻”

文/侯宝良

我去菜场里买菜，路过肉摊头，碰着邻居老汤辣买带皮个夹心肉，凑上去问：“侬打算回去做红烧肉吃啊？”伊回答：“包馄饨吃”。摊主称好份量，就热心帮伊去皮、切块，随口问老汤，皮啊要？老汤摆了摆手意思勿要了。我马上制止讲：“伊勿要就拨我好口来。”老汤弄勿懂，讲：“以前我侪覅个。”摊主讲：“现在除非做带皮肉吃，切片、切丝、绞肉酱，啥人还会要搿种肉皮。我也是当下脚料处理个，看辣侬是老顾客面浪。侬要就再多送侬几块。”从旁边拿出几块肉皮，统统放进绞好个肉酱袋里，交拨老汤。

回去路浪，我跟老汤讲肉皮个营养价值：伊个蛋白质含量邪气高，含有胶原蛋白，对皮肤健康交关有好处。尤其是阿拉搿种有点年纪个人，可以延缓皱纹出现，增加皮肤弹性。

听我讲得头头是道，老汤接口：“闲话有点道理，勿过么，哪能吃法呢？总不好单单烧碗肉皮吃口伐？”我朝伊挤眉弄眼，要么今朝我露一手，做一只冻肉皮个冷盆让侬尝尝看？老汤讲，今朝回去要包馄饨，蛮忙个，下趟再讲。我讲便当来兮，勿碍侬事。侬只要请我吃馄饨就好啦。

回到屋里向，我先拿肉皮用温水汏干净，等水烧开拿肉皮放镬子焯水去沫。再放多眼水煮。老汤边看我操作，边拌馄饨馅料。十几分钟过去，水烧开了，我拿肉皮捞出来切成细条，再摆进镬子里，告诉老汤放料酒、加盐、葱姜末，还有生抽。问伊屋里阿有蚝油，有个闲话也放一眼，最后加点白糖，盖上镬盖开煤气中火煮。然后拍拍伊肩胛，讲：“走，一道去包馄饨。”我一边包馄饨，一边又告诉伊，稍微吃点肉皮冻可以补充B族维生素，改善反应迟钝、记忆力下降之类个问题。当中辰光，我又去翻炒了两次，看到汤汁有点粘了就改用小火焖。

馄饨包得差勿多了，老汤准备下馄饨。我看镬子里个肉皮已经完全酥烂，就关脱煤气。叫老汤拿出几只冰箱保鲜玻璃盒备用。

一歇歇馄饨可以出锅了，我也勿客气，搭仔老汤一道吃仔一顿馄饨。等镬子里个肉皮温度下来了，就倒进玻璃保鲜盒里，放进冰箱冷冻。随后跟老汤讲，等结冻以后可放到冰箱个冷藏格里，吃晚饭辰光倒出来，切成片就可以吃了。欢喜清淡个，可以淋点柠檬汁；欢喜咸鲜个，可以蘸点酱麻油。

搿天夜饭辰光，老汤用微信发来一张照片，里向时饭桌浪个一盆肉皮冻，而且对伊个味道赞不绝口，还讲：“以后再去买肉，迭块肉皮再也勿放弃了。”