亲情勿比风景推板

文/钱红春

前半生忙忙碌碌，退休以后，我搭仔老伴终于有了可以自由支配个时间，屋里个经济状况也勿错，所以经常出门旅游。好几年前，我同老伴跟旅行团到英国旅游。当时看过点啥个景点，已经勿大记得了，倒是发生辣旅行团里个故事仍旧记得清清爽爽。

旅行团里有一对小夫妻，两家头侪是三十几岁。有一趟等车子个辰光，阿拉两对夫妻档攀谈起来。小夫妻里个老公小李讲：“看到亻那两位老人，就会想到自家姆妈。”据伊讲，伊姆妈老早曾经上山下乡，阿爸过世得早，姆妈一家头拿伊培养成人。伊姆妈除脱插队落户个地方，呒没去过其他地方，更加覅讲出国了。伊搿趟本来想带姆妈一道出来旅游，但姆妈要照顾八十多岁个老外婆，坚决勿肯出来。伊讲个辰光，眼睛里充满对阿拉两家头个羡慕。我劝伊讲：“侬姆妈真勿容易，趁伊现在身体好，多带伊出去走走看看。”伊连连点头。后来伊为姆妈挑选了一双皮鞋搭仔一条羊绒围巾。我感叹：“多亏侬还记得侬姆妈鞋子个尺码。”

旅行团里年纪最大个是一位张阿婆，已经七十八岁了。一开始伊勿大同别人搭讪，好像有啥心事。有趟同伊辣一张台子浪吃饭，边吃边讲，才晓得伊八十多岁个老伴，因为生毛病已经困辣床浪好几年了，从早到夜侪是伊服侍。搿趟是小人主动提出帮忙照应老人，逼伊出来旅游散心，伊老伴也交关支持。啥人晓得伊刚下飞机，老伴就打电话问伊：“侬勿管我啦？”弄得伊心神勿定。我老伴笑笑讲：“侬看侬跑开一歇歇，老伴就想侬了。”伊听了有点勿好意思。“啥年纪了，还像小囡一样。”听上去像埋怨，其实伊心里蛮开心个。张阿婆一路浪拍仔交关照片，按伊个讲法：老头子呒没一道来，就多拍点照片让伊看看。

四十出头个许女士是同女儿一道参加旅行团个。辣飞机浪同阿拉夫妻俩坐辣同一排，一来二去，互相熟悉以后，伊告诉我，搿趟到英国旅游，一是伊从来呒没出过国，想开开眼界；二是女儿期末考试成绩勿错，旅游算是奖励；三是女儿就要高中毕业了，有出国留学个想法，搿趟旅游途中打算参观几个著名个大学，实地考察一番。“只要条件允许，小人个正当要求，做爷娘个哪能会勿支持呢？”我接过话头，对伊女儿讲：“侬看看，侬姆妈多少关心侬，一定要更加努力喔。”

赵阿婆原来是中学老师，老伴已经过世。出发前，媳妇塞拨伊二千英镑路浪零用。但看来看去，伊啥物事侪勿买。就连受到中国游客欢喜个当地特产——羊绒围巾、黄油饼干之类，伊侪勿舍得掏腰包。啥人晓得到了比斯特购物村，伊买了名牌风衣搭仔拎包，是阿拉旅行团里花费最多个。原来，媳妇对伊交关好，平常嘘寒问暖，伊老早就想买点东西送媳妇了。出发前，伊特地到商场里打过样，同样牌子搭仔款式，比斯特购物村个价钿便宜勿少。“媳妇平常待我勿错，拨伊买点也是应该个，再讲搿点钞票本来就是伊个。”大家听了侪对伊翘大拇指。