老友闲话II

娄一晨

前天下午，我正坐在家里看书，老友X打来电话。

X：娄兄啊，今朝上半天额世界棒球经典赛决赛日本VS美国侬哪能没转播啦？真好看呀……看了吗？

我：呵呵，我就晓得侬肯定会看的呃！最后大谷翔平上来关门额辰光侬紧张吗？

X：是额呀，整个上半天哦，我两个日本朋友一面帮我视频一面看球，紧张得来胡说八道，听到额侪是骂人闲话。最后日本队赢额辰光两只戆大激动得来捺手机也掼脱来……

我：哈哈哈，正常呃……搿趟世界棒球经典赛蹲了日本国内影响力勿得了，可以讲是2023年以来日本最大额一桩事体。我看到日本新闻媒体报道讲日本队几场比赛额收视率比东京奥运会所有比赛侪要高。

X：啊？介吓人啊？

我：嗯，真呃……我报一些数据拨侬听哦……3月10日，日本VS韩国，小组赛，朝日电视台帮TBS电视台直播，收视率44.4%，收视观众6230万人。3月16日，日本VS意大利，1/4决赛，收视率48%，收视观众6260万人。半决赛、决赛额数据还呒没出来……

X：6200多万人？太结棍了！基本上就是日本全国一半额人口了……

我：是呀。连得我朋友圈里厢居然也有三个朋友，正好侪勒嗨日本白相，发出来朋友圈讲伊拉到东京巨蛋现场去看中国VS日本额比赛去了……

X：唉，老娄啊，我现在是完全同意侬上趟吃饭额辰光帮我讲额观点，阿拉国内实在是没一点点棒球基础，连得一点点看球额氛围也没……侬晓得额呀，我到日本蹲勒交关年数，朋友圈子里厢多少人侪是像我一样上海东京来回跑呃，结果除脱几个日本人以外，中国朋友几乎就没人看棒球呃……想寻人一道看球也寻勿着……

我：老兄啊，迭额生活侬急也急勿出呃……基础勿一样，国情勿一样，生活方式勿一样，侬没办法去强求一致呃……

X：每趟听侬一讲，一点点信心也没了……

我：呵呵，迭额没办法呃，勿是一代人两代人能够解决额问题的……就算我天天蹲了马路廊厢、微博里厢拼命喊大谷翔平今年年薪3000万美金，明年甚至有可能超过5000万美金，有用吗？基础勿是靠阿拉几个人喊出来额，是要靠一代一代人一直喊一直喊，一直推动一直培养才有可能建立起来……

X苦笑：呵呵，我又只好相信侬了咯？