难忘初中技能课

文/孙进

多年前，我进了一所普通中学初中就读。虽然校舍新新，老师和蔼，但没有进入重点中学个遗憾一直萦绕心头。

开学后个新生大会上，校长郑重其事地宣布，阿拉学堂虽然只是普通中学，但有一项特殊个学习要求，其他学堂包括重点中学侪呒没嗰。看着大家表情疑惑，伊很认真地告诉阿拉，为了提高大家个综合素质，初中毕业时除脱常规学业成绩，每个人还必须掌握四大技能——骑脚踏车、英文打字、电器修理和乐器演奏才能毕业。

四大技能？之前阿拉侪呒没听说过，不过同枯燥个语数外相比，搿几门技能课无疑更受大家欢迎。首先是从骑脚踏车开始，搿是大家最欢喜个一门课程，每个礼拜安排一节课，就辣学堂操场浪向学。当时脚踏车算是贵重物品，学堂里是呒没配备嗰，就发动学生把自己家里个脚踏车骑来，有些老师也把自己个脚踏车拿出来给同学们骑。每次上课，两三个同学搭档，一个骑车、另一个在后面把着行李架。课上大家大呼小叫，气氛分外融洽。只是半个学期左右，同学们不仅学会了骑脚踏车，而且侪成了好朋友。期末搞了一次“骑慢车”比赛，欢欢喜喜、热热闹闹完成了考试。

第二学期是学英文打字和电器修理，当时电脑很少，学堂就买了一批手提英文打字机，每周安排一节打字课，打字内容是学堂挑选个比较浅显个经典英语作品，结果大家不仅学会了打字，还提高了对英语阅读个兴趣。电器修理则是穿插辣劳技课当中，期末考试内容就是自家动手组装一盏日光灯，从开关、线路到灯管，从焊接、上螺丝到包接头，完全是实战化操作。让人呒没想到个是，考场浪向女同学一扫平常柔弱个样子，考得比男同学还要好，让现场督阵个校长频频点头。

乐器是最难嗰，当时大家经济条件侪勿大好，钢琴之类个贵重乐器侪是买不起嗰。学堂就分了层次，经济条件一般个同学就学口琴，经济条件比较好嗰就买手风琴。不管学啥乐器，侪按照五线谱教学，而不是当时流行个简谱。校长讲，乐器虽然不贵重，但标准不能降低。到了学期末，每个班级组织一场音乐会，每个同学表演一只曲子。演出中，个别同学演奏得不流畅，大家就一起鼓掌，“掩护”他通过。考核就辣大家开心个笑声里完成了。

初中毕业典礼浪向，校长辣致辞中特意提到，大家除脱得到一张毕业证书，还掌握了四大技能，搿点技能今后可以伴随大家一生，甚至有可能比书本知识更有用。阿拉虽然勿是重点中学，但是阿拉毕业生个能力比重点中学嗰还要强。当时听了感觉不以为然，中考、高考侪不考个内容有啥用呢？

后来上了高中，学堂离家远了，交通不便，骑脚踏车是最方便个方式。当时爷娘侪不会骑车，屋里也呒没脚踏车，如果不是初中学会了骑车，上学放学不晓得要浪费多少时间。上了大学后，正赶上专业授课调整，以往很多辣纸面浪向完成个作业、课程设计侪改成电脑完成，要不是初中打下个英文打字基础，肯定要手忙脚乱一段辰光。工作以后，电脑打字也是一项不可获缺个重要技能。至于修理电器和乐器识谱，更是贯穿整个生活历程，甚至一直影响到现在对下一代孩子个教育。细细回想，当初好多让人绞尽脑汁个课本知识侪已经忘记得差勿多了，但是搿点初中辰光学会个技能一直伴随着成长和生活。现在想想当初校长个闲话确实有道理，搿点技能真是一生个伙伴啊。