香椿，香一个春天
图文/沈一珠
上礼拜到广东韶关去白相个辰光，有一天是住辣树屋里嗰。当然，迭个树屋勿是造辣树浪向个房子，只是造辣树林里个房子。搿也有得好了，早浪起来，推窗看出去，人赛过立辣一片树林头顶浪向，树脚下个溪流声，好像是树枝、树叶发出个呼吸声。远远交还传来布谷鸟个叫声，布谷声声，是辣了催播种个声音，也是辣了催收获个声音，收啥啦？喏，收香椿头呀，再勿采，就老了。
“雨前椿芽嫩如丝，雨后椿芽生木质”，此地个雨，就是谷雨。春天里末脚一个节气，一把香椿，香仔一个春天。
香椿头煎蛋，是绿颜色搭仔黄颜色个搭配，盛辣雪雪白个瓷盘浪向，好看得让人开胃；蛋终归就是蛋，就因为有了香椿头，所以，一筷入口，三春勿忘。
香椿头拌豆腐，又是另一种体验了。开水焯一焯，红梗转成碧绿，用盐捏一捏，斩成碎末，摆辣豆腐浪向，滴眼麻油，拌一拌入口，绿与白，是冷冷清清个味道。
香椿，一个春天个享受。
放大
上一版