调锅鋬有感

文/许德华

上海人搿歇用个天然气比老早个人工煤气火力猛，炒只小菜炖两只蛋又快又方便。勿过因为火力太猛，不锈钢炒锅个两只胶木鋬被烤焦了，一只锅鋬与锅子分了家。看炒锅仍旧石骨挺硬，勿舍得厾脱，就抽空骑脚踏车到老北站边浪向个虬江路工业品市场去配新锅鋬。

搿搭物事行情行市，穿个衣裳，用个手机，坐个电动三轮车，还有家用小商品像打气筒、砧墩板、扦脚刀、指甲钳咾啥，价钿勿贵，买得多还可以讲价。对我来讲，就是勿买物事轧闹猛看野眼也蛮开心嗰！

我熟门熟路直冲当中横里配锅鋬搭仔橡皮垫圈个一爿店家。柜台前有好几个顾客，正与当班师傅交谈，看起来勿侪是熟客。当班师傅邪气热情，业务也相当熟。我刚刚拿出炒锅，说明要配锅鋬。伊只是瞟了一眼，就对我讲：“搿搭个锅鋬‘眼子’勿对，侬到其他地方瞄瞄！”

我只好打了一个招呼离开。

又逛了几家店，呒没寻到尺寸合适嗰。有一家还对我讲侬自家辣里向寻寻，我看了半日觉着“眼子”合勿拢，伊拉勿装配我又呒没工具，算啦！最有意思个是最后一家老板讲伊搿一抢呒没进货，侬真要搿物事就先付钞票，伊去进货。我问几钿？伊讲两只廿块。我有眼嫌贵，一只锅鋬5块洋钿碰顶了。我又讲：“搿能样子好口伐，我锅子摆辣侬搿搭，给侬廿块，侬帮我装好，过两日我来拿。”老板讲伊不装个，侬自家动手。喔唷，买只赤括辣新个炒锅不过百把块，调两只锅鋬倒要廿块，勿合算！索性厾脱买新嗰。

锅鋬配勿着，只好回到老店家门口拿脚踏车。搿歇店里呒没人，师傅看到我主动招呼。伊还记得我是来配锅鋬嗰，就问我配到了口伐。我讲呒没。伊讲有一种老式锅鋬，样子勿一样，但看起来尺寸差勿多，而且价钿便宜，两只5元，假设我不计较，伊可以帮我试试看。我想总比厾脱实惠，就讲：“好。”师傅拿螺丝刀卸脱坏锅鋬，拿新锅鋬安装上去，居然扣揢扣，尺寸正好。第二只锅鋬个螺丝油滋隔腻，师傅本来是立辣海做生活嗰，迭歇坐辣小矮凳浪，搿紧锅子用力卸螺丝，头浪向汗也出来了。亏得老虎钳帮忙，终于成功换好。

调好新锅鋬，锅子看起来交关神气，老板娘笑嘻嘻辣边浪向打朋：真生活啊！5块洋钿忒少了，侬应该给伊10块。师傅一边揩手一边讲：“哎哎，就是5块，我一开始就迭能讲嗰。”我当然捂心啦，拍师傅马屁：“侬做个生活呒没闲话啦！我认准侬搿人，认牢亻那搿爿店了！”