捉夜乌子

文/周钰栋

一到热天，最闹猛嗰要算蝉了。伊躲辣树浪向一刻勿停个叫着“知——了，知——了”。于是勿少人就依照搿种叫声叫伊“知了”，但更多嗰还是叫伊“夜乌子”。至于为啥要叫伊“夜乌子”，有一种讲法是因为伊日里向叫得邪气起劲，到了夜里向却一声勿响，像哑子一样，于是就叫伊“夜哑子”，而辣上海闲话里“哑”与“乌”读音相近，所以就演变成了“夜乌子”。

老底子一到放暑假，阿拉男小囡就喜欢到树浪向捉夜乌子白相。讲起捉夜乌子上海小囡有交关办法，譬如看到夜乌子躲辣树浪向个位置比较低，就直接爬上去用手捉；要是伊躲个地方比较高，就拿一块面团摆到清水里不停用手捏，等面团变成面筋以后就可以粘辣竹头浪，再去粘夜乌子。但是老早粮食金贵，迭种办法阿拉勿大会用，大多数情况下头阿拉侪是收集松树浪滴下来个松油粘辣竹头浪，再去粘夜乌子。

夜乌子捉来以后，有人欢喜用一根线缚牢伊，牵辣手浪向，让伊辣身边兜圈子飞，也有人拿伊养辣一块西瓜皮浪，想听伊叫，可惜捉来个夜乌子一般勿叫。请教懂行个人，原来受到惊吓个夜乌子是勿叫嗰；另外，只有雄夜乌子会叫，伊肚皮浪有两片音盖，音盖内侧有一层薄膜，薄膜振动就发出叫声，雌夜乌子呒没搿层薄膜，所以勿会叫。夜乌子捉来几天就会死脱。问了老师才晓得，搿是因为夜乌子勿能适应新个生存环境。老师还讲，夜乌子会预报天气，要是伊大清老早就叫得起劲，搿天肯定热得勿得了。再后来，阿拉就勿捉夜乌子了。每当午后，困辣凉席浪向，听窗外传来夜乌子个叫声，感觉有一种与自然和谐相处个美妙。