小钵头甜酒酿
文/侯宝良
啥人还想得起老早卖小钵头甜酒酿个“标配”？一个人踏部黄鱼车辣街头浪、弄堂里兜兜转转，车子浪侪是装满甜酒酿个小钵头，有辰光还有眼称分量卖个糯米粉小圆子。踏车子个人斜背一只摆钞票个旧书包，一边踏车子，一边笃悠悠个叫：“小钵团甜酒酿。”为啥是“钵团”，据说埃歇辰光做搿种生意个大多数是崇明来嗰，搿是“乡音”。
甜酒酿应该算是徽州风味，哪能小钵头甜酒酿拨崇明人做出“名”了呢。有一趟我同一个小崇明茄山河。我讲：“崇明人做糯米糕是蛮灵光，做甜酒酿、糯米小圆子勿是崇明特色，哪能现在有介许多崇明人做酒酿生意呢？”伊讲，改革开放以后勿少人拿农田承包拨别人，自家出来做生意。上海人吃惯崇明老白酒，再开发小钵头甜酒酿，正好适合城里人贪便当又爱清爽个习惯。有人做甜酒酿生意赚到了钞票，回到村里造起漂漂亮亮个房子，同乡朋友之间一讲一传，勿少人就跟风出来做搿种生意了。
后来超市也有甜酒酿卖了，“小钵团甜酒酿”个声音越来越少，慢慢交就听勿见了。现在社会发展越来越快，行业更替在所难免，旧行业消失，总会有新行业兴旺起来。
放大
上一版