野菜点心味道好

文/周允中

年纪轻个辰光走南闯北到处走，辣勿少地方吃到过用野菜制作个点心，哪怕到了几十年以后个今朝，一提起来仍旧感觉齿颊生香。

薄荷糕是江南地区个特色小吃，用野生薄荷放进冰糖和蜂蜜熬成汁水，放进绿豆或豌豆粉，搅拌成为浆糊，然后加进开水，加点明矾，一面加热一面搅拌，等浆糊变得透明，再放辣锅子里隔水冷却，最后切成块。也有简单一眼个做法：用明胶加菱粉、藕粉制作，味道又甜又凉爽，邪气适合大热天吃。

杜甫写过一首《槐叶冷淘》，所谓冷淘，就是用槐叶嫩芽汁水和面做成面条煮熟，再放进冷水里向浸泡，北方人叫“过水凉面”，味道清香，再浇点爆炒黄酱肉糜，就是京城里有名个炸酱面，黄酱味道偏咸，一边吃面，一边咬黄瓜，特别爽快，真是绝配。

香椿炒蛋卷饼和油炸香椿薄饼，也是让我印象深刻个美食。据记载，阿拉国家辣汉朝就已经开始吃香椿嫩芽了，北方人有谷雨食椿个习俗，民间也有“三月八，吃椿芽”“常食椿芽，百病不沾”个

谚语。椿树还是长寿个象征，称父亲为椿庭，萱堂为母亲，“椿萱并茂”比喻父母健在。金代诗人元好问有《溪童》一诗云：“溪童相

对采椿芽，指似阳坡说种瓜。想是近

山营马少，青林深处

有人家。”可见吃香椿个历史邪气悠久。

榆树叶也是可以吃嗰，据说以前闹饥荒个辰光，就有勿少人靠吃榆树叶救命。至于用榆树叶制作个食品，品种勿少，有榆叶饼、榆叶馍、榆叶饭等。我吃过个榆叶饼是拿新鲜榆树叶汏干净切碎，跟面粉一道做嗰。

面蒸榆叶也是北方地区个一道点心。做法是搿能介个：先拿汏好晾干个榆树叶倒进盆里，均匀撒进荞麦粉，拌揉均匀，加少许食用油，再加盐、味精及芝麻粒。不断揉搓，让每张叶片侪粘到粉，再蒸半个钟头就可以了。

另外，还有人用榆树叶做饺子馅，榆树刚刚长出来个嫩芽，采下来用开水汆过以后，放进肉糜里向。用搿种馅包个饺子味道邪气赞。