帮儿子剃头也是享受

文/钱红春

疫情呒没结束，交关剃头店呒没开门，儿子一早浪就上门要我帮伊剃头，讲等一歇要上网课，人要弄得清爽点。我一边帮伊剃头，一边想起伊小辰光个事体。

儿子刚刚养出来个辰光，头发墨墨黑，油光光，还有点鬈，看起来邪气好白相，一直舍勿得剃脱。一直到伊一岁多点，天气热了，才下决心拨儿子剃头。

搿天吃好中饭，夫妻俩一道带伊走进剃头店，店里为阿拉安排了一位有经验个老师傅。儿子胆子小，一看店里人侪穿白大褂，当是医院个医生，又要打针，吓得眼泪汪汪。老师傅手里剃头轧刀“咔嚓咔嚓”个声音辣儿子头浪刚刚一响，伊就穷哭八哭。老师傅只好哄哄伊，等伊平静下来再剃一眼，就搿能剃剃停停，个把钟头还呒没剃好。眼看店里客人越来越多，阿拉夫妻俩一道动手夹牢儿子，让老师傅一鼓作气“速战速决”。

走出剃头店，儿子像受仔邪气大个委屈，哭个勿停。当阿拉帮伊清理碎头发个辰光，发觉儿子面孔浪，头颈里有交关红颜色个斑点，乃末急煞，连忙赶到医院。医生看了，讲搿是小囡受到惊吓后个出血点，吃点药就好。辰光不长，儿子头发又长了，有了前头个教训，勿敢再带伊进剃头店。还好我当兵辰光，战友之间侪是相互剃头，我个手艺也算勉强过关，于是我就买来剃头轧刀自家帮伊剃。为了勿让儿子再受惊吓，每趟剃头，我侪是等伊辣我大腿浪困着，左手托牢伊头，右手轻轻交剃。后来儿子长大了，有点懂事体了，剃起来就呒没介麻烦了。

等到儿子读中学，我想小囡大了，也要好看了，怕自家动手剃得难看，让伊拨同学笑话，有一趟就让伊自家到剃头店剃。埃歇辰光店里侪“鸟枪换炮”用电轧刀，比起手动轧刀既快又好。啥人晓得“吃素碰着月大”，搿天剃头剃到一半，店里突然断电，电轧刀夹牢儿子个头发，尴尬得勿得了。剃头师傅改用手动轧刀，大概是手动轧刀长期勿用，刀齿有点钝，儿子个头发好几次被夹牢，疼得伊叫起来。从此以后，伊再也勿肯到店里剃头。就搿能，一直伊高中毕业出国留学，侪是我帮伊剃头。

后来儿子回到上海做老师，结婚成家以后住辣别个地方，常常来阿拉屋里看望，有辰光顺便要我帮伊剃头。我晓得，伊勿是觉着我剃得有多好，也勿是要省搿眼剃头钞票。对我来讲，帮儿子剃头，也是我顶顶开心个辰光，就好像又回到老早，好像听到伊奶声奶气“快点快点”个催促声。

儿子剃好头就急匆匆走了，临走关照我勿要出门，要吃点啥买点啥，就打电话拨伊，伊会送过来。我听仔邪气开心。帮儿子剃头，其实是难得个享受。