漫谈沪语溯源与创新

文/宓重行

上海话其实并勿是单单由上海人创造嗰。有史以来，像一切口头语言、笔头文字一样，要靠大家“共同创作”。归根结底，上海话主要是由上海本地、包括天南地北，还要加上从国外漂洋过海到上海来过日脚个人，大家一道创造、开发，一道讲出来嗰。

一直讲“上海是一个海”。对！上海闲话同样是一个海：要拿海水“化验”起来，成分交关复杂，所以假使有兴趣拿上海话一词一句弄弄清爽，一定是老有意思嗰。阿拉勿妨一道来看看有点上海话个来龙去脉，挖挖“根”；侬肯定会觉着蛮好白相。

上海话当中有个“茄门”个讲法，大家晓得差勿多等于“呒没兴趣”。为啥“呒没兴趣”要讲“茄门”勿叫“瓜门”呢？据说里向有一个小故事：

老早有一家有钞票人家，屋里请了个教书先生，先生看到院子里长满新鲜茄子，就想尝尝鲜。先生开门出去，一边欣赏茄子一边吟诗：“东家茄子满园栽，未与先生进一餐”。东家一听觉着事体好办，接下来就一连几天茄子当家，一日三餐顿顿茄子，吃得先生叫苦连天；伊只好拿院门关得紧腾腾，又摇头晃脑做起诗来:“哪能一茄茄到底？要吃容易覅吃难！”从此以后，迭扇院门就成了“茄门”个出典。还好搿个东家屋里勿种豇豆、萝卜，否则讲起来阿要难听？

原来是北地方言个“二百五”，哪能也会轧进上海话里呢？原来是舞台戏曲起个作用。用北方话和中州音演出个京昆戏里有一齣蛮有名个《蝴蝶梦》；戏里有个装扮呆头木脑、由人摆布个角色。因为演出要求低，所以薪酬勿高：只要开销二百五十文铜钿，弄个男小囡上台就解决了。后来“二百五”就用来形容有人碰到事情总归弄勿明白、拎勿清爽；倒勿是讲伊勿值铜钿。怪勿得鲁迅先生会讲，老百姓有交关“学问”是辣戏馆里看戏辰光得来嗰；真是一眼勿错。

现在上海人勿大分得清“老门槛”和“老举”，感觉意思一式一样。沪语中“鬼”“举”有辰光同音，有人还拿“老举”写成“老鬼”。其实，“老门槛”是指“门槛实精”，有非同一般个味道，绝对勿是简单个“老举”——侬想，能够辣“门槛”里向个算老资格，当然要比辣外头混腔势个“老举”本事大得多。讲句笑话，“老门槛”和“老举”有点像上下级关系，赛过是“专家”和“熟练工”个档次。“老举”听上去像“老鬼（ju）”，看起来勿推板，但一看字面有点“鬼头鬼脑”，上勿得大场面。要是侬去对掌勺大厨讲“侬老举我放心”，反过来对传菜工讲“侬是老门槛”，两方面恐怕侪会勿开心：对前者勿够尊重，又弄得后者稀勿弄懂——看看勿过是口头使用方言，但要表达好意思，精细起来一点勿好输拨书面语言。

还有像“热昏”“瘪三”“闹猛”……看上去像煞一样，用场勿同意思就会完全两样。譬如，“我看侬有点热昏”“侬对我好得热昏”：前者责怪“侬”头脑发热、思维混乱；后者是对“侬”邪气感激，对我忒好了！“瘪三”当然是鄙视人家个骂人闲话，但是老人对自家欢喜个小囡会讲“小瘪三介乖，真好白相”，一记头变成昵称了。“哦哟！实在吃勿消介闹猛”“今朝排场勿闹猛，啥辰光再闹猛？”此地两个“闹猛”，一贬一褒分别表示“讨厌”和“希望”，感觉正好相反。还有，写出来像外国话个上海话：“亨八冷打”，其实倒是从广东来嗰，也就是“一塌刮之”个意思。当然，上海话当中“进口货”也勿少：像“有好物事侬脱我哈夫（half，对半分）”，“搁落三姆（gross sum，合计、全部）侪拨侬，一点勿留。”——上海话当中嵌“洋泾浜”英语，大家肯定老早侪熟悉了。

作为当代上海人，可以多了解点过去个老上海话，开发、创新更加好点个新上海话——上海闲话是勿断变化发展嗰，希望上海闲话能够保持健康发展！