上海人个瓜子情结

文/管 弢

勿少上海人侪有瓜子情结，因为辣相当长个一段辰光里，茄山河、吃瓜子是家家户户逢年过节个标配，后来又变成宅家一族消磨辰光个必需品。丰子恺先生曾经描写过当年上海滩少爷和小姐、太太们个吃瓜子绝活——男版：“一粒瓜子塞进口里，那嘴巴就像一具精巧灵敏的机器，只消‘格’地一咬，‘呸’地一吐，早已把所有的壳吐出，嚼食瓜子的肉了。”女版更显优雅：“把瓜子垂直地塞在门牙中间，用门牙去咬它的尖端，‘的、的’两声，两瓣壳的尖头便向左右绽裂，然后那手敏捷地转个方向，同时头也帮着微微一侧，让瓜子水平地放在门牙口，用上下两门牙把两瓣壳分别剥开，咬住了瓜子仁个尖端抽出来吃。”

辣物资供应紧张个年代，瓜子需要凭票购买，一年只有两三趟，每户每次限半斤。搿点瓜子肯定呒没办法满足阿拉上海人个需求，大家只好自家想办法。每到热天吃西瓜个辰光，西瓜籽收集起来，汏干净，放到太阳下头晒干，再放到空饼干桶里。当年市场浪个西瓜品种有好几种，西瓜籽有大有小，最受欢迎个是平湖瓜和开封瓜，瓜籽又大又宽。解放瓜个瓜籽就特别小，大家戏称“鳖瑟虫”，想要从搿种瓜籽里向吃到瓜子仁就困难了。除脱西瓜籽，还有南瓜里向个瓜籽也会拨收集起来，勿过呒没西瓜籽受欢迎。

等到年节之前，家家户户侪开始炒瓜子，搿也是我记忆里个开心事体。当年我最喜欢做个家务就是炒瓜子，因为可以边炒边尝，最后还能瞒仔大人自家囥一包。记得当时同一幢楼房里几户人家个小囡会约好仔一道炒瓜子，辰光一般定辣吃过中饭以后，因为搿辰光共用灶披间最空。为了炒瓜子，大家侪要提前准备干净黄沙，炒瓜子要先从炒黄沙开始，等黄沙炒热以后再拿瓜子放进去，也有人觉得黄沙勿干净，改用粗盐代替，比如两楼亭子间里个宁波阿娘，伊拉屋里个阿毛就是用粗盐炒瓜子嗰。可惜用盐只能炒出咸味道个瓜子，用黄沙炒出来个瓜子可咸可甜。一开始大家有说有笑，拿仔锅铲比比画画。等倒进去个瓜子炒热了，手浪翻炒动作不断加快，唯恐炒糊，原本嘻嘻哈哈说笑个嘴巴侪开始“格格”嗑瓜子，还勿时到旁边小伙伴个锅子里抓一把尝尝。

炒瓜子就像炒菜，大家侪有自家个诀窍。当年比较流行嗰是咸味酱油瓜子和甜口甘草瓜子。我姆妈会提前几天去中药房买来甘草粉，事先放辣碗里用水调匀，等瓜子起锅之前倒进去翻炒，让瓜子壳浪裹一层甜甜个薄粉，我感觉吃口不亚于当年闸北炒货厂个“佳梅”牌话梅瓜子。

上世纪80年代，商品经济解放了生产力，买瓜子也勿需要凭票了，有段辰光大家特别欢喜吃瓜子，饭前吃、饭后吃、看电影吃、茄山河更加要吃……当年有一部罗马尼亚电影《神秘的黄玫瑰》，其他情节勿记得了，印象最深嗰是马尔杰拉图同志吃瓜子：葵花籽连盘端起，边走边吃，动作潇洒，特别有腔调。当时我就希望有一天能像搿位马同志一样吃瓜子，当然后来真个实现了。再后来，市面浪个瓜子品牌里出现了交关名牌，比如闸北炒货厂个“好运来”酱油瓜子，勿过我总感觉还是阿拉辣“灶披间”里嘻嘻哈哈“生产”出来嗰更加有味道。

上世纪90年代，我随夫东渡，人辣异乡更加思念故乡个亲朋和美食。到了大热天，我吃瓜留籽，春节前辣屋里用盐炒熟。新春聚会个辰光，看到我像变戏法一样“变”出来个“酱油瓜子”，“老乡们”顿时大喜，一下子就哄抢一空。美食是亲情连接个纽带，乡愁是异乡人心头个痛。阿拉上海人侪有一个瓜子情结！