记忆里最闪亮个日脚

文/赵妃蓉

“蓝蓝的天空银河里，有只小白船……”去年因为网剧《隐秘的角落》个播出，《小白船》搿首歌曲又被交关多人想起来了，因为搿首歌是阿拉小辰光经常唱嗰。我也想起小辰光参加学堂里合唱队个情景，因为我个音准比较好，又欢喜唱歌，所以小辰光读书以后就被老师挑选进了合唱队。

埃歇辰光学堂里只有一间音乐教室，开门就是操场。当年学堂放学以后呒没补课，也呒没家长会等辣校门口接小人，所以大多数同学放学以后侪欢喜到操场浪打打篮球、做做游戏，白相一段辰光再回家。合唱队个排练也是安排辣放学以后，听到操场浪个欢声笑语，阿拉搿点小朋友也会心痒，所以阿拉个排练是经常受到干扰嗰。但是大多数辰光阿拉还是认认真真排练嗰。音乐教室里个布置特别简单，除脱一架钢琴就是几排长条凳，墙壁浪向还贴了几张外国人个画像。老师呒没介绍过画像里是啥人，我也从来呒没问过，但每趟进音乐教室我侪会朝搿几张海报多看几眼，因为伊拉总归让我有一种神圣感，觉得伊拉侪勿是普通人。直到我长大以后接触了西方古典音乐史，才晓得搿几个音乐家是海顿、莫扎特和柴可夫斯基。

音乐教室里个长条凳呒没靠背，阿拉上课辰光就必须坐得昂首挺胸，迭能一来，反而可以让阿拉更加好个完成气息吐纳，唱歌也更加容易字正腔圆，迭种长条凳培养出来个挺拔坐姿我一直保持到今朝。

当时阿拉经常唱个歌有《春天在哪里》《缆车》《童年》《小白船》《幸福拍手歌》等等，尤其是唱《幸福拍手歌》个辰光，因为歌词里有拍拍手、跺跺脚、拍拍肩个动作，所以每趟大家侪会立起来唱，一边配合着动作，教室里向闹猛得勿得了。还有意大利民歌《缆车》，因为音乐节奏邪气有动感，唱个辰光就好像阿拉真个坐到缆车浪向去了，尽管埃歇辰光我还呒没乘过缆车，但是鲜明个音乐节奏就可以带阿拉搿点小朋友进入乘缆车个氛围了。

除脱每年参加百灵鸟合唱节比赛，阿拉学堂个合唱队还会定期到黄浦区少年宫参加演出，每趟演出之前个化妆总归会让阿拉搿点小姑娘邪气期待。等到立辣舞台浪向，灯光打开个一刹那，心里总归还是蛮紧张嗰，但是为了下一趟再可以来演出，我总归会抖擞精神唱好歌。长大以后参加工作，作为一个电视节目个导演，每趟指挥灯光师亮灯，节目开场个辰光，我侪会感觉到一种充满激情个平静感，充满激情是因为对新节目个期待，平静是因为灯光亮起来个辰光我就好像穿越到了小辰光个舞台浪。直到今朝我还一直珍藏着合唱团个歌谱夹，封面浪向是我一笔一画工工整整写个班级和名字，小辰光参加合唱队个经历辣我人生个河流当中就好像是春天里穿过田野个溪流，辣金色阳光个照耀下，水面闪着光亮，叮叮咚咚，欣喜欢腾，一路奔向未来……