春天里，韭菜香

文并图/沈一珠

春天里，有交关好吃小菜，菜苋、香椿头、竹笋、荠菜、马兰头……其实，春天更加是吃韭菜个季节。

交关上海人勿欢喜韭菜，嫌比伊味道重，也觉着伊辛辣上火。其实，一年四季侪有个韭菜是有四种味道嗰：春香、夏辣、秋苦、冬甜。所以，眼门前迭段辰光个韭菜，讲通俗点，就是吃好仔，嘴巴里是勿臭嗰，稍微刷刷牙齿，嗽嗽口，出门谈工作，会朋友，勿需要有心理障碍。更加难得个是，春天里个韭菜碧绿生青，满满春意，偏偏又是顶顶家常，唾手可得。

“夜雨剪春韭，新炊间黄粱”是当年杜甫一首长诗《赠卫八处士》当中个两句，整首诗表达个意思是身处乱世，朋友即将别离，勿晓得下趟啥辰光再能碰面。即便如此，朋友还是可以冒雨出门剪一把春韭，一碟韭菜和一碗新鲜烧出来个黄粱米饭，还是可以让人暂时忘记一切烦恼嗰。

韭菜可以当配菜，比方讲，打三两只草鸡蛋，一小把韭菜切碎，用油炒匀端上来，金黄颜色个鸡蛋当中，青青翠翠个韭菜隐隐约约，又好看又开胃口。

韭菜当然也可以是主菜，配春天里个黄蚬肉一碟，炒一只“春韭炒蚬肉”，一白一绿，是春天饭台浪个一景。

具体做法：准备春韭半斤左右，黄蚬肉半斤左右，猪油、盐各少许。先拿韭菜汏清爽，切成段，备用；再拿蚬肉焯水备用，水里加少许料酒去腥。热锅加猪油少许，油滚后，下韭菜、蚬肉，大火翻炒一分钟左右，加少许盐调味，出锅即可。

再加一句，趁热吃，口感肥笃笃；冷脱了，荤油结牢，就黏滋疙瘩了。