智慧导览看上博

文/许德华

年初，上海博物馆举办“卓荦迎新——中韩牛年生肖交流展”，我就寻了一个风和日丽个日脚到上海博物馆看展览。

去之前先做功课，据说有四件摆辣大厅，还有五件分别躽辣一到四楼勿同个场馆里，需要观众凭“火眼金睛”寻出来。搿倒是一桩新鲜事体，为了提高效率，我辣开始参观之前特地租了一台“智慧导览器”，来个“寻宝”实践。

大厅里个展品容易寻，其中一只商代晚期个青铜酒具“凤纹牺觥（gong）”是牛个造型，搭手机差不多高一只小巧个老虎是酒具个盖鋬，牛身浪刻画了鸟、兽等纹路邪气精致；韩国牛形展品“铁制嵌银丝方形火炉”也特别好看。牛是农业时代勿可缺少个生产工具，搿两件展品侪反映了牛辣传统文化里个意象。

本身以为有了导览器可以老快寻着宝贝，勿想进了一楼青铜器馆，导览器“叽叽”乱响跳出来好几只文物图片，一下子倒寻勿出“寻宝目标”个准确位置。原来迭只导览器还可以介绍除脱牛年交流展品之外更多个上博收藏。喔唷，赚了！

我先锁定一只牛鼻头穿环个“春秋牺尊”。搿是上海博物馆个镇馆之宝，辣上海版初中历史教材里有伊个插图。搿件文物说明了三千年前农民已经晓得“牵牛鼻头”耕田。

四楼绘画馆个《甯（ning）戚饭牛图页》是五件展品之一，因为同一时期又新增了其他九幅画件充实翻新了绘画馆，因此我要寻个“饭牛图”勿晓得囥辣哪只角落里。按牢导览器“地毯式”搜素，终于辣门边浪向看到，豪燥揿数字导览器，马上就有了文字介绍，原来搿幅清朝年间个古画画个是春秋年代个故事：春秋年间，有一个叫宁戚个男子，有志从政却无法向齐桓公表达。一天，齐桓公郊外迎客，齐巧拨宁戚碰到，伊一边喂牛一边拍牛角歌唱，向齐桓公表白治国平天下心愿。迭桩事体搭成语“毛遂自荐”有点相似，赞美齐桓公不拘一格网罗人才。

有趣个是“智慧导览器”还会提醒侬已经看过多少，漏脱呒没看嗰有多少，有图有统计。像“玉童子牧牛（玉器）”搭仔最后看到个“宴乐画杯(青铜器)”，侪是后来补看嗰，尽管花脱我一天辰光，但是我觉得迭能个文化生活绝对超值。上海博物馆真是“乐龄人”智慧养老个好地方呀！