童年趣事

文/乾 道

小辰光到了礼拜天，总希望大人带阿拉出去白相。啥地方去？埃歇辰光也只有公园好去。只要天气好，姆妈拿屋里个家务做好了，就会牵仔我个手讲：走！复兴公园兜一圈。

当时阿拉屋里住辣淮海路，复兴公园离得勿远，后弄堂穿过去就是南昌路，经过科学会堂就到了雁荡路复兴公园后门，走走几分钟。公园门口有一只卖门票个小亭子，门票5分，1.2米以下免票。有段辰光，我身高就辣门口搿根线上下，碰着比较顶真个阿姨就会讲：“过来，量量看”。我走到线下，双脚并拢，趁阿姨看搿根线个辰光膝盖就稍微弯一弯，碰到好心个阿姨看了会笑笑，讲：“哦，算了，进去口伐！”搿辰光心里开心啊，又混过去了。

走进大门，路过草坪，直奔复兴公园当中个小湖，因为湖边是最闹猛个地方。每趟去，侪会看到有人吹笛子，有人拉提琴，还有人走象棋。湖边最引人注目嗰就是一棵老粗个法国梧桐树，树根横过来长，直冲湖面，小朋友侪喜欢辣树浪爬上爬下，勿当心也有落到湖浜里嗰，后来就发现树浪包了一块铁皮，上下更方便了。

春天里向，我最喜欢带一只铅丝拗个网斗到复兴公园个湖边捞拿摩温，装辣小瓶子里带回去养，运道好个辰光还能捞到两条小金鱼。到了太阳快落山个辰光，阿爸姆妈叫“回去了”，我身浪向已经出仔交关汗，衣裳也变得龌龊八拉，但是心里爽啊，白相得真开心。

复兴公园是我童年个乐园，留下交关美好回忆，现在回想起来，还是蛮开心嗰。