为老母鸡当“小保姆”

文/史美龙

春夏之交，老母鸡一天到夜混淘淘，趴辣窠里打瞌目充，乡下头称搿种现象为“煞窠”。煞窠鸡有人讨厌有人欢喜，讨厌个是：食仍旧要吃，蛋基本勿生。欢喜个是，经常能孵出小鸡来，省铜钿。小辰光屋里向经济条件推扳，爷娘就叫我当煞窠鸡个“小保姆”，孵一窠小鸡。

搿天，选好可以孵出小鸡个蛋，再认认真真做好孵小鸡个“豪华间”。呒没想到，老母鸡看到铺好稻草、棉絮个“软卧”，一点勿动心，反而金窠银窠勿及原来个老窠，几次三番拒绝进入“豪华房”。我一时情急，就辣里向放仔一窠鸡蛋，老母鸡看到鸡蛋眼睛发光，马上轻手轻脚蹲下来，用尖尖个嘴巴拿散放个鸡蛋拨到翅膀下面。看到老母鸡情绪稳定，我心里总算踏实下来。

孵小鸡，意外防勿胜防。有一天夜里，睏梦头里突然听到鸡叫，开灯一看，一只老鼠从鸡窠里逃出来，老母鸡伸长头颈，“咯咯咯咯”叫得惊心动魂。听说饿昏个老鼠会偷蛋吃，连忙抱起老母鸡一看，10只鸡蛋少脱1只，旁边是湿答答个碎蛋壳。为了对付老鼠，我辣鸡窠旁边放了勿少老鼠夹，但是老鼠邪气机灵，好像晓得有危险，一段辰光里向销声匿迹。我猜想，或许是老母鸡个自卫反击让老鼠长了记性，晓得伊惹勿得。

老母鸡孵蛋相当认真，有个辰光会拿蛋夹到翅膀里向，而我一无所知。有一趟早浪向，我想抱老母鸡出来放风喂食，辣末生头听到“啪嗒”一声，只觉着脚板浪热乎乎，低头一看，发现鞋子被碎鸡蛋弄得一塌糊涂。先后有两只鸡蛋侪是搿能“牺牲”嗰，想想真是肉麻。

大约过了半个月。一天夜里，我照常拿鸡蛋到灯光下头“体检”，发现8只鸡蛋里各有一团黑影，说明每只蛋里侪有了小生命。老母鸡好像也心知肚明，勿分昼夜用嘴巴“咕噜咕噜”轮流翻蛋，转移到身边最暖热个部位拥抱起来。听仔搿种富有节奏感个“摇篮曲”，我夜里困觉也困得特别香。

听大人讲，孵小鸡一般需要廿天。但到了搿天早浪，孵窠里向一点动静也呒没，老母鸡也是勿动声色。我一下子额角头浪冒出汗来，真担心搿一窠小鸡像蒸山芋蒸到一半熄火——僵脱。当天辣学堂里，我经常辣课堂浪走神，拨老师批评了勿少次。好容易等到放学，三步并作两步朝屋里跑。刚进门就听见孵窠里传来“叽叽喳喳”个声音，奔过去一看，8只毛绒绒个小鸡围绕辣老母鸡旁边扑腾，好像辣演奏春天交响曲。有一只特别调皮，扑到老母鸡个背浪向，好像准备“登台独唱”一番。

我之前个担心一下子侪呒没了，剩下来个是满满个成就感。心里做道算术题，一只小鸡值3角，8只小鸡等于2块4角。放到现在，搿眼铜钿勿算啥，当年可以买80只咸大饼。再算一算小鸡长大了，还能天天生蛋。开心之余，我深深佩服老母鸡480多个钟头勿离勿弃培育新生命个精神，送拨阿拉一个改善生活个希望。