春色迷眼 花香怡人

文/邵天骏

春天来了！上海到处是绿色搭仔鲜花个风景。离我屋里勿远个古李园里，还有阿拉小区周边道路旁，满眼侪是春浓草绿，处处侪是花草芳香。我每天吃好夜饭出门散步兜马路，总感觉有一股甘甜涌入心田，老适意嗰。

附近个华东路是我经常去散步个地方。路两边侪是经过精心修剪、布局精致个绿化，惊喜勿少。搿里，花团锦簇，花草茂盛，花香怡人，鲜花竞相开放，争奇斗艳。我慢慢交就弯进了一条小路，放松心情欣赏鲜花绿叶带拨我个舒适视觉效果，从容捕捉阳光增添出来个无穷活力气息。一歇歇，就看到几只交关漂亮个鸟雀相互嬉戏降临辣我身边个草丛里，欢快跳跃鸣叫。一阵阵温暖微风吹过，树枝、绿草搭仔花朵轻轻晃动，好像辣呢喃细语。

明媚春天，路边杨柳树枝偷偷交荡起秋千，老多个高大树木带来春色一片，与周围一眼望勿到尽头个草坪，共同编织成一幅邪气漂亮个风景画。马路当中，车来车往，邪气热闹，地面浪倒是交关清爽，好像灰尘侪拨数勿清个树木、花草吸收了。看到眼门前整齐个绿化带，我陶醉辣大自然个韵味里，勿知勿觉辰光就过去了。

浓浓绿，青青绿，油油绿，花开花香侪辣里向，妙勿可言。对上海来讲，园林化城市格局老早就勿稀奇了。勿仅辣华东路，就是辣我住个小区里，也是举目翠绿，绿意盎然。大大小小个草坪，一块隔一块，一处连一处。一些花木，辣温暖个阳光里，开出迷人个花朵。可以讲，现在个上海，一年四季处处见绿，边边角角也勿缺绿植覆盖。

辣高楼大厦搭绿化相互映衬下，有人见人爱个花草日夜相伴，实在是一桩让人高兴个事体。大自然个杰作，总是能够将最美一面呈现拨大家。春天，带拨我个是美感十足个春景，我已经完全融入了春色里，流连忘返，欲罢勿能。