逛街网购 各有乐趣

文并图/沈一珠

从前买物事是要兜商店嗰。小辰光住辣天山一条街，礼拜天跟牢姆妈兜绸布商店是一桩苦差事。

一走进去，铺天盖地侪是各种布头个味道，的确良、花洋布、纯涤纶，各有各个味道；我当时人小，头刚刚挨着柜台，结果，各种味道沉下来正好侪辣鼻头旁边，闷得透勿出气来。

后来我长大了，平常有空，就欢喜跟闺蜜一道兜马路，一条淮海路随便兜兜就是一天，走得肚皮饿了，就辣弄堂口吃碗小馄饨。一天下来，有辰光也呒没买啥物事，想想迭个辰光兜个应该是心情。

刚刚开始有网购个辰光，心里也是蛮抵触嗰。买物事个辰光，看一看摸一摸个乐趣侪呒没了。

勿过，辰光长了，居然也习惯网购了，居然也寻着乐趣了。想想，人也真是老容易移情别恋嗰。

其实网购还有一个优点。到店里买物事，有辰光看一眼，旁边人夸一夸，自家脑子一热就买下来了。过两天看看，又勿欢喜了，就厾了旁边，既浪费钞票又占地方，冲动害煞人。网购就勿一样了，有了看中个物事，可以先放辣购物车里，摆两天。过两天冲动过去了，再看看，也就呒没兴趣了。