记忆里的烟纸店

文/裴天蓉

阿拉隔壁一条马路一群老房子动迁了，老房子矮平房已经老旧了，搭周围的高楼、花园小区有明显落差。老房子沿马路有一爿烟纸店，因为烟纸店对面就有一所小学，所以店里备货偏向小朋友，比如铅笔、橡皮、练习本、红领巾，还有各种小零食。到了放学辰光，勿少小朋友侪欢喜到烟纸店里买点小零食。

去年开始拆迁，老房子里人侪搬脱了，烟纸店里东西也清空了，有人讲老板娘一家去住新房子了，有眼小人放学走出校门还会朝烟纸店方向看看。我不晓得哪能想起老早读小学的事体。

记得埃歇辰光，阿拉读小学的地方是辣弄堂石库门房子里，一扇黑大门进去，教室侪蛮小的。弄堂一头是马路菜场，早浪人声鼎沸。另一头是一条弹硌路，路两边有烟纸店、老虎灶、米店、煤球店，还有大饼油条摊……早浪学生进了校门，黑大门关起来，教室里还是蛮安静的。

每天放学出校门，阿拉侪要排好队伍，整整齐齐。当时大多数家庭侪是双职工，爷娘要上班，小人上学放学是呒没人接送的，侪是小人自家走回去，头颈里挂一把房门钥匙，回到屋里，自家开门，自家做作业。阿拉放学以后侪欢喜到附近烟纸店里兜兜。

记得弄堂对面一爿烟纸店是一个老伯伯开的，柜台浪向有一排玻璃瓶子，里向装满各种颜色的小零食。阿拉搿点小朋友最欢喜花花绿绿的颜色，看看也开心。有辰光，约一两个同学一道去，去之前先商量好，侬买糖、伊买盐津枣，或者买橄榄、话梅咾啥，反正买好以后大家分分吃，老伯伯会帮阿拉分门别类，用黄颜色纸头包成三角包。我也欢喜去烟纸店，买点小零食放到体育课浪吃。阿拉学堂地方小，体育课只好辣弄堂里上，跑步、跳远辰光，嘴巴容易干，含一粒盐津枣就蛮开心了，老师又不会发觉。

埃歇辰光搿爿烟纸店是阿拉搿点小学生的最爱，是可以自由支配勿多零用钿的地方。吃自家买的小零食感觉比吃大人买的更加扎劲。几十年过去了，搿点小辰光的事体好像一直不会忘记脱，时勿时就会从记忆深处冒出来，像看电影一样清爽。