雨后春笋正逢时

文/侯宝良

正是竹林中春笋冒头的旺季，一夜雨后，一只只笋尖钻出泥土，长得邪气快，有人形容讲，走几步回头看看刚刚钻出的笋尖又蹿出一长节。用成语“雨后春笋”来形容再恰当勿过。

记得我第一次用“雨后春笋”搿句成语是1963年三四月份的一堂班会课。当时社会浪兴起了一股学雷锋做好事的热潮，像客轮服务员杨怀远的“小扁担”助人为乐；三轮车工人程德旺的“2963号”三轮车积极救助病患，被誉为“第二救护车”……后来，南京军区73181部队被中央军委授予“南京路上好八连”荣誉称号，社会浪又掀起向解放军学习的热潮。人人讲节约，提倡艰苦朴素、勤俭持家，反对铺张浪费。“修旧利废、变废为宝，节约一滴水、一度电、一寸布、一张纸”侪是埃歇辰光提出的口号。

有趟学堂里上班会课，老师要求大家用一句成语来概括当时勿断涌现的社会新风貌。沉默片刻我先举手回答：雨后春笋。也有同学讲层出不穷、推陈出新……最后老师总结，成语“雨后春笋”最恰当，还表扬我观察事物仔细用心，其实搿是我从竹笋里吃出来的。

每年二三月份，阿奶每天买菜总有竹笋，饭桌浪向勿是油焖笋，就是笋丝炒咸菜、竹笋拌莴笋。笋丝炒蛋比较少见，腌笃鲜只有客人来的辰光会有，因为肉蛋侪要凭票购买。我问阿奶哪能会有介许多竹笋？伊讲：“迭种季节只要落一场雨，竹笋就蹿得快，有句成语叫‘雨后春笋’就是形容雨后出笋多得来勿及挖，现在正是吃笋的辰光。”哦，短时间里多了，就叫“雨后春笋”，我记牢了！大家想想现在是勿是又逢其时了呢？