小辰光个记忆：猜角子

文 /喻平官

两人或两人以上，三人四人也可，手握物件勿被其他人看到，盲猜总和数。轮流竞猜一次，然后嘴里“唱票”几个，摊开手掌，总数猜对通吃猜物。最初是猜一分硬币，所以就叫猜角子，也有叫“猜骰子”。勿过么，当时大家屋里侪比较拮据，物价也低，一分一粒糖，两分一包盐金枣可以吃半天。阿拉搿点小朋友基本呒没零用钿，即使袋袋里有几分洋钿，也勿舍得拿出来“猜”。所以，凡是能一手握个小物事，侪可以当成竞猜个“筹码”。诸如小弹珠、小纽扣等，而炒熟个黄豆、蚕豆最受欢迎，因为赢了能饱口福。

猜角子也勿是凭运气瞎猜猜，有规则，要赢有“讲头”。设有上限，一般十只，最多十五只，再多了一把抓勿牢容易“露馅”。每次握注上限封顶，勿能空心；输者逐次减码，勿得再加，直至清零。搿能一来，先猜后猜就有讲究了，以两人单挑为例。先手者出数“2”，势必认定对手握“1”，估对则赢。反之，暴露己底，必输无疑。因此，先手勿会做此傻事，除非对方只剩一个子了。一轮猜毕无输赢，仍由先手继续先手，防止伊作弊故意乱叫。

我也热衷其中，自认为猜角子也是项动脑子个益智小游戏。阿拉几个搭子小伙伴乐此不疲，一有空就凑辣一道伸手握拳。赢了喜形于色，输则垂头丧气。久之，冷硬个筹码也勿待见了，能吃个食品才能凑起人。那是个物资匮乏个年代，能吃个东西大多要凭票购买。还好，我们轮流“做庄”，搿趟侬抓把盐炒豆，下趟我带点炒黄豆，一五一十大家平分猜起来。也勿会穷尽输赢“剃光头”，差勿多了就叫停。手里剩下来个“筹码”，嘻嘻哈哈一吃了之。

日脚长了，搭子里小伙伴个性各异，皆可成像。阿三者，猜角子常有份，却从勿“坐庄”。好在伊人小气，抓小勿抓大，勿是抓一就是抓二，输多赢少。小龙就两样，伊阿爸是跑长途个卡车司机，有野路。从外地买得到土特产，小龙就一大把花生米“做豪庄”。有次勿晓得从啥地方搞来蛋黄花生，还呒没开始猜，阿拉已经馋得流口水。大家侪欢喜跟小龙白相，几天勿见就打听伊人去哪了。

还有个搭子，个子瘦小，能量勿小，能连翻三四个后空翻，阿拉侪叫伊猴子。伊闲话勿多，像伊阿爸，辣杂技团充当哑巴小丑角色。猴子辣阿拉个猜角子圈里，是出名个狠角色，几乎呒没输过。尽管伊也有点阿三个味道，出份子做庄少。但每次赢了勿会独吞，会退出三分之一归对手。一时兴起，伊还会拿战利品全部贡献出来，让大家共享快乐。

关键还是伊总赢，伊越赢我们越勿服输。我跟小龙接成连档模子，立辣猴子背后，偷看伊放辣身后个双手动作。偷看到了，我就做手势暗示小龙。啥人晓得仍旧呒没用，仍旧输，明明我看到是三个，揭晓时就变成其他个数。害得小龙埋怨我青眼光，互换角色，伊也同样看勿准。

随着年龄增大，猜角子逐渐被其他游戏替代。多年后，当年个小伙伴侪辣关注自家小人白相啥物事个辰光，猴子再次出现，已是大名鼎鼎个魔术师，荣归故里，宴请发小。

席间，谈到当年猜角子，我承认为了要赢伊耍过手段。猴子笑道，我晓得嗰。伊拿出一枚形如五角硬币大小个小金币，价值万元。金币像是粘了万能胶，辣伊手背手指间上下翻滚自如，移动至掌心握紧，松开，金币呒没了。而后，从上衣口袋里找出……懂了口伐，其实要我输很简单，每次要先让我摊开手掌亮相，而勿是让我先听亻那两家头报数。

鬼猴子！原来侬当年已经做老千了？搿勿叫老千，搿叫魔术。猴子拿手浪一枚金币放辣台面浪，两手合掌似握一乒乓球，搓呀搓，一枚，两枚，搓出三枚金币。惊讶之余，伊还让阿拉轮流配合，即兴大秀近身魔术。

回到屋里，我发现口袋里有一枚金币，打开微信群，小龙和阿三侪辣追问：一块金币！