大家侪客气一眼

文 /侯宝良

俗话讲“和气生财”，又讲“和为贵”。阿拉中国本来是礼仪之邦，看重礼节、礼貌，讲究“礼”字由来已久。其实辣生活搭仔工作中哪能运用“礼”是有讲究嗰，用法勿一样，结果也勿一样。

阿拉小区附近有两爿灯具店，一家老板是一个上点年纪个宁波人，见人就笑、态度蛮客气，看到有人辣伊店门口立停，伊就会来招呼。假使有啥家用电器方面个问题来求助，伊往往有求必应。要是侬有看中个商品，搭伊讨价还价，伊只要有眼赚头侪肯松口。葛咾搿爿店一日到夜勿缺顾客，生意蛮好。再看相隔勿远另外一爿灯具店，招牌做得蛮漂亮，商品摆放也有模有样，明码标价，还辣店堂里显眼地方贴了“谢绝还价”。平常总归看到店主辣店里忙忙碌碌，即使有人走进店里，除非顾客主动开口，店主基本浪勿会开口招呼。搿两爿店具体经营情况勿了解，毕竟现在有勿少实体店也辣网浪做生意，或者有大客户帮衬，但是附近居民侪欢喜到第一家店买东西。

前几天周末，正好太阳比较好，大家侪抓紧辰光洗洗晒晒，结果五楼晾晒个毛衣有水滴飘落，滴湿了三楼晾晒个棉花胎。三楼个苏州阿姨气匆匆直奔五楼，边敲门边责问：“倷讲勿讲道理？住楼浪要想想下面人家啊！”出来开门个是借房子个年轻人，伊了解情况后，连连打招呼：“真是对勿起。”还腾出阳台空间来帮阿姨晒出棉花胎。经过一番交流，本来要吵相骂个邻居倒成了好朋友。

生活里向，常常会有勿顺心搭仔各种矛盾。学会“礼让”往往会拨自家跟别人带来和睦个气氛。人侪希望受到尊重，也要懂得尊重别人。