炖一锅参鸡汤

文并图 /沈一珠

天冷了总想吃点热乎乎个汤汤水水。老清老早起来，半罐头米，再捉一小把糯米，一道淘清爽，摆两碗水进去，高压锅烧开，调小火焖10分钟，清清爽爽个白粥就成功了。粥汤滑腻清亮，米粒肥糯爽口，配一只荷包蛋，一碟糟方乳腐，几根甜酱瓜，服帖。

中午，还是生炒小青菜加参鸡汤，从小到大，总感觉鸡汤是顶顶养人嗰。

鸡汤关键是鸡，小区里有一家肉店，店主是老实巴交一对中年夫妻，卖出来个肉或者鸡，基本浪侪是崇明来嗰，而且一律标明源头，具体到崇明某村某号某室某姓氏。现在有一眼品质稍高一点个买菜APP也就迭能样子了，吃个放心。早浪过去，让老板娘帮忙寻一只一年半以上2斤以上个鸡，现在碰着迭种，也可以叫老母鸡了。鸡算是活杀嗰，老板娘总归老热情讲，侬看呀，还是热烔烔个喏。

鸡摆冷水里烧滚，将滚未滚辰光，火调小，沫沫头一点点浮出来，耐心耐向，用漏勺轻轻交拿伊撇清爽。左左右右撇一撇，拿鸡油小小心心留下来，特特为为留了点鸡油一道笃，就想吃一口带一层腊腊黄鸡油个鸡汤。然后，鸡汤调到高压锅里，加几片浸泡片刻个西洋参，加适量西洋参补气；勿好加多，以闻勿出参味道为好；适量盐，适量葱结、姜块，开大火，烧到高压锅气阀锁牢，调小火闷15分钟就好了。

盛一碗鸡汤，汤水浓而清，鸡油黄而香，撒细细碎碎葱花一小把，实在好味道。吃饭个闲话，加一碟清炒青菜，一小碗米饭；吃面个闲话，青菜切碎，摆鸡汤里滚熟，下一把银丝细面煨勒鸡汤里，看看闻闻吃吃，胃口就开了。