小辰光个晚报时光

微信扫码看视频听钱程沪语朗读

◆ 赵妃蓉

现在大家获取信息个渠道实在是太广泛了，有辰光勒了手机浪向看一篇文章，手机页眉个地方还勿断有推送消息，要获取真正勿会受到打扰个纯净式阅读体验，我还是欢喜看书或者看报纸杂志。

我接触电脑是勒了工作以后，小辰光看个第一份纸质读物就是《新民晚报》，从幼儿园回到外婆屋里，搬一只竹矮凳，坐勒了门口等晚报是我每天最欢喜个事体。记忆里最嗲个是正好落了一场大雨，天空出现一道彩虹，我就勒了迭个辰光拿到当天晚报，顿时满心欢喜。哪怕隔了几十年，回想起来迭种感觉还是觉着斜气开心。

埃个辰光晚报只有6个版面，勒了识字有限个学龄前阶段，我就只好看看《娃娃天地》，有辰光会连猜带蒙个看看大标题。对我来讲，《新民晚报》就是最早个文化启蒙，让我老早就体会到学习个快乐，通过一个一个方块字，开始认识迭个世界。

上小学以后，每到放暑假个辰光，每天下半天到邮局买晚报是我个固定节目。现在个人一定想象勿到，埃个辰光买晚报是要排队嗰。下半天4点钟左右，晚报新鲜印出来，队伍已经排到邮局门外头了。晚报带着一阵油墨香，搭仔邮局里其他书报杂志一道散发出来个味道勒了空气里飘散，让人对等一歇买到手个报纸更加充满期待。大概因为阿婆们侪勒了屋里向忙着烧夜饭，排队买报纸个除脱我迭能个小囡，绝大多数侪是爷叔。伊拉一边摇蒲扇一边茄山河，前一天夜里个足球赛经常是话题个中心，讲到激动个地方，爷叔还会得猛拍大腿感叹：搿只球哪能呒没踢进球门啦……送到个晚报分成两大沓，一沓是四个版面，一沓是两个版面，工作人员左右手个食指浪各套一只橡皮指环，两手一搓一捏，从两沓报纸里各拿出一张，拼成一份晚报，动作是斜气流畅。对我来讲，看伊拉熟练个手势也是一种享受。

爷叔们买好晚报一卷，往裤子后插袋一插，就到隔壁买散装啤酒去了。想象一下，畅快个吃杯啤酒，吃饱夜饭以后，勒了弄堂里寻一个风口，横勒了躺椅浪向看晚报是多少惬意个事体啊。大热天个弄堂里，下半天大家侪勒了水门汀浪向浇水降温，从地面升腾起个热气搭仔弄堂口吹进来个风交织勒了一道，让白天热辣辣个气息退场。迭个辰光，知了叫了一天也开始休息了，随身携带个小收音机里向“纳凉晚会”也快要开始了，四方邻里个窗子里，隐隐约约传来“新闻联播”个开场音乐……看好晚报，拿最要紧个消息搭仔“蔷薇花下”个趣闻记牢，第二天就勿缺谈资了。有辰光，我真是想念老早信息慢慢传递个时代，有更多个思考、传播个乐趣，从前个慢有慢个味道，慢有慢个趣味。