养过一只黄伯劳

◆ 周爱民

小区楼前头一块4000多平方米个大草坪碧绿生青。搿天，几只名叫黄伯劳个鸟，一歇歇辣草坪上找食，一歇歇飞到树浪鸣叫。眼前个场景，让我小辰光养黄伯劳个记忆一记头激活了。

60多年前一个夏日，父亲个朋友送来一只比麻雀大眼个小黄伯劳，讲是雷阵雨辰光飞到屋里来嗰。伊个头顶到上背部为灰色，朝后渐成棕色，肩羽、下背至尾上覆羽为橙褐色，两翅搭子尾巴呈黑色，毛羽有眼稀疏。下体大部分为白色，脚趾却是黑嗰，嘴巴带钩，鸣叫声斜气响亮。伊立辣弓型鸟架浪，两只眼睛乌黑有神，鸟头转来转去，一眼勿怕人嗰。

黄伯劳只吃荤食。大热天，我约几个小伙伴摸鱼虾、粘知了、捉蝈蜢、钩皮虫。黄伯劳顶喜欢吃皮虫，不过从壳里向剥出来黑呼呼会蠕动个皮虫，的确有眼腻心。鸟老快跟我熟勒，一靠近就会过来讨食吃。一段日脚后，伊个羽毛长得油光发亮，还会模仿黄鹂鸟个叫声，我心里老开心嗰。

一天夜里，黄伯劳从气窗飞出去了，我一夜呒没睏好。早浪头，我趴勒北阳台栏杆浪，模仿黄伯劳个叫声。突然，一团黑影边叫边从马路边个树浪飞过来，落勒阳台栏杆浪。“黄伯劳回来了！”我摸摸肩胛浪个鸟，开心极了。黄伯劳边吞食物边歪头看我，好像辣海道歉。

我常常同小伙伴一道放飞黄伯劳。有辰光去野外，引导黄伯劳捉蚯蚓、帼蜢、青虫咾啥。伊吃饱以后，就会飞到我肩胛浪，我感觉覅太好喔。有一次，我跟小朋友辣屋里斗螊绩。黄伯劳突然飞过来，用脚捉牢跳出盆外个螊绩，同时一口将盆里正鸣叫个螊绩吃脱，围观个小人侪呆脱了。

天气热，姆妈逼牢我睏中觉。睏辣床浪，我一吹口哨，黄伯劳就会飞过来，停勒我肚皮浪望野眼。一歇歇，又凑过来辣我手浪磨磨弯钩嘴，轻轻叫几声。

搿年深秋个一天中浪，我听到有两只鸟一唱一和。从窗口望出去，外头杨柳树浪有一只羽色淡个黄伯劳辣低鸣，我个黄伯劳辣阳台栏杆浪鸣叫回应。我走到阳台浪，黄伯劳不再急吼吼要吃嗰，反而躲到边浪，看牢树浪个鸟。几声低鸣，我个黄伯劳振翅飞向柳树，两只黄伯劳并排立辣一道，朝我看，晃晃小脑袋，大概辣海向我告别，然后鸣叫着飞远了。

第二年初夏个一天，窗外个杨柳树浪飞来几只黄伯劳，叫声蛮熟悉嗰，勿晓得是勿是那只黄伯劳个一家门回来了。