“物尽其用”与“断舍离”

◆ 胡维兴

阿拉搿点出生勒上世纪六七十年代个人，从小接受个教育就是“勤俭节约”“精打细算”，拿穿个衣裳来讲，就有“新三年，旧三年，缝缝补补又三年”个讲法。勿过么，搿能一来，屋里物事越积越多，占用了大量空间，反而挤压了生活空间。仔细分析一下，介许多物事当中，其实七成以上侪是基本勿可能再拿出来用嗰，只是摆勒角落里积灰而已。再看阿拉个子女，伊拉厾起物事来毫不留手，每年总归要掼脱几大包衣裳。

其实时代勿同了，阿拉个思想也要与时俱进，虽然物尽其用有伊正确个方面，但是适当个“以旧换新”和“断舍离”，勿但能改善生活品质，还能用消费促生产。尤其是老年人，更加需要做减法，变“勤俭持家”为“精简之家”，抛弃一眼无用物事，轻装过日脚，让老年生活过得轻松愉快、自由潇洒！