弄堂里向包粽子

◆ 周钰栋

小辰光住勒一条弄堂里，左邻右舍个经济条件侪勿宽裕，除脱吃穿用度往往所剩无几。即便如此，逢年过节，大家还是要庆祝一番。就拿端午节来讲，包粽子是弄堂里个一桩大事体。事先要浸糯米，浸赤豆，浸五花肉，泡粽叶，盆盆罐罐一大堆，等到真正开始包粽子个辰光，屋里向根本摆勿开，只好到弄堂里去做市面。

我姆妈擅长包小脚粽。伊坐勒一张小板凳浪，左手边是一脚盆粽叶，右手边是两盆一锅，其中一盆纯糯米，一盆拌过赤豆个糯米，一锅拌过酱油肉个檽米。只看见伊左手撩起三张粽叶错落有致个搭好，轻轻展开、撸平，然后两手一合，手指头一弯就拿粽叶卷成一只圆筒，右手抄起一把檽米往里灌，灌满，再用大拇指压实，最后盖上一张旧粽叶，再用一根棉线绕二圈扎牢，一只精致、细巧个小脚粽就做好了。

当然，弄堂里还有一眼自家包勿来粽子，或者单位里生活忙，呒没辰光包个人家，只要拿各种原料准备好，再搭会包粽子个阿姨、爷叔打个招呼，大家侪会帮忙搞定，让侬勒端午节里吃到粽子。

等大家拿各式各样粽子包出来以后，弄堂里就好像开起了展销会。张家喜滋滋拿出三角粽，吴家眉开眼笑拿出枕头粽，阿拉周家拿出来嗰当然就是弹眼落睛个小脚粽，嬉笑欢乐溢满整条弄堂。而搿个辰光顶开心个要算阿拉搿点小囡，眉心浪点了一点雄黄，头颈浪挂仔一串勿是宁波阿娘包个就是无锡好婆包个迷你六角小粽子，勒弄堂里穿来穿去，到处卖洋。正当大家喜笑颜开个辰光，总有热心人会发调头：“索兴大家互相拿粽子交换一下，拿回去各种各样个粽子侪吃吃看，看味道哪能。”搿种闲话一出，一记头拿弄堂里集体包粽子个欢乐推向高潮，同时也拉开了热热闹闹过端午个大幕。